Ադրբեջանի քաղաքացիները կկարողանան Ուզբեկստան մեկնել ներքին անձնագրով

Ուզբեկստանը քննարկում է Ռուսաստանի, Ղազախստանի և Ադրբեջանի քաղաքացիներին ներքին փաստաթղթերով կամ անձը հաստատող քարտերով իր տարածք մուտք գործելու թույլտվություն տալու հնարավորությունը։

Ինչպես հաղորդում է Caliber.Az-ը, այս մասին ասվում է երկրի նախագահ Շավքաթ Միրզիյոևի «Զբոսաշրջիկների հոսքի արմատական մեծացման և 2025-2026 թվականներին զբոսաշրջային ծառայությունների ծավալի ընդլայնման արագացման միջոցով տնտեսությունում զբոսաշրջության դերի և նշանակության բարձրացման միջոցառումների մասին» հրամանագրում:

Փաստաթղթի համաձայն՝ նախաձեռնությունն ուղղված է ճանապարհորդությունների պարզեցմանը, զբոսաշրջության, բիզնեսի և մարդասիրական կապերի զարգացմանը։

Երկրի մարզեր զբոսաշրջիկների հոսքը մեծացնելու նպատակով Ուզբեկստանի արտաքին գործերի նախարարությանը հանձնարարվել է երեք ամսվա ընթացքում բանակցություններ սկսել [այս երեք երկրների համապատասխան գերատեսչությունների հետ] և դրանց արդյունքների հիման վրա ներկայացնել իր առաջարկները [կառավարությանը]: Առաջարկությունները վերաբերում են Ռուսաստանի Դաշնության, Ղազախստանի և Ադրբեջանի քաղաքացիների համար՝ ներքին փաստաթղթով կամ անձը հաստատող քարտով հանրապետության տարածք մուտք գործելու ռեժիմի ներդրմանը մինչև 30 օր ժամկետով։