Ադրբեջանի, Վրաստանի և Հայաստանի արտգործնախարարները կքննարկեն տարածաշրջանային զարգացումը

Անթալիայում դիվանագիտական ֆորումի շրջանակներում կանցկացվի «Հարավային Կովկասում տարածաշրջանային համագործակցության մարտահրավերներն ու հնարավորությունները» թեմայով պանելային քննարկում։

Ինչպես հայտնում է Caliber.Az-ը, միջոցառումը տեղի կունենա շաբաթ օրը՝ ապրիլի 12-ին։

Քննարկումներին կմասնակցեն Ադրբեջանի, Վրաստանի և Հայաստանի արտգործնախարարներ Ջեյհուն Բայրամովը, Մակա Բոչորիշվիլին և Արարատ Միրզոյանը։ Սպասվում է, որ արտաքին քաղաքական գերատեսչությունների ղեկավարները կքննարկեն Հարավային Կովկասում առկա գործընթացները՝ ուշադրություն դարձնելով տարածաշրջանային համագործակցության թե՛ հեռանկարներին, թե՛ առկա խոչընդոտներին։

Առանձնահատուկ ուշադրություն ծրագրվում է հատկացնել տարածաշրջանի կայուն և ներառական զարգացման խնդիրներին՝ գլոբալ անկայունության համատեքստում։