Ադրբեջանի և Իրանի միջև ապրանքաշրջանառությունը հասել է ռեկորդային մակարդակի

Անցյալ տարի Իրանի և Ադրբեջանի միջև ապրանքաշրջանառությունն աճել է ավելի քան 30%-ով՝ սահմանելով նոր ռեկորդ։

Ինչպես հայտնում է Caliber.Az-ը, այս մասին հայտարարել է Ադրբեջանում Իրանի դեսպանատան գործերի ժամանակավոր հավատարմատար Սեյյեդ Ջաֆար Աղայի Մարյանը՝ Բաքվում Իրանի Ազգային օրվա կապակցությամբ կազմակերպված ընդունելության ժամանակ։

Նա նշել է, որ երկկողմ տնտեսական կապերը շարունակում են ամրապնդվել. «Շահին Մուստաֆաևի այցը Իրան և Տնտեսական, առևտրային և հումանիտար համագործակցության միջպետական հանձնաժողովի 16-րդ նիստի անցկացումը հաստատում են, որ այս տարին էլ ավելի հաջող կլինի մեր երկրների համար»։

Դիվանագետը նաև նշել է, որ երկու երկրները շարունակում են ակտիվորեն իրականացնել մի շարք համատեղ նախագծեր տրանսպորտի, էներգետիկայի և արդյունաբերության ոլորտներում։

«Այնպիսի ենթակառուցվածքային նախագծերը, ինչպիսիք են Հյուսիս-Հարավ տրանսպորտային միջանցքը, Արազի միջանցքը, Աստարայի նոր սահմանային անցակետն ու տերմինալը, Աղբենդ-Քյլալա կամրջի կառուցումը վկայում են Ադրբեջանի և Իրանի միջև տնտեսական համագործակցության մեծ ներուժի մասին»,- ընդգծել է Աղայի Մարյանը։