Ադրբեջանն ու Կատարը քննարկել են համատեղ զորավարժությունների անցկացման կարևորությունը

Կատար կատարած այցի ընթացքում Ադրբեջանի Հանրապետության պաշտպանության նախարարի առաջին տեղակալ, Ադրբեջանական բանակի գլխավոր շտաբի պետ, գեներալ-գնդապետ Քերիմ Վելիևը հանդիպումներ է ունեցել Կատարի պետության փոխվարչապետ և պաշտպանության գծով պետնախարար, Նորին Մեծություն շեյխ Սաուդ բին Աբդուլռահման բին Հասան Ալ Թանիի և Կատարի Զինված ուժերի գլխավոր շտաբի պետ, գեներալ-լեյտենանտ Ջասիմ բին Մոհամմեդ Ալ Մաննայի հետ, տեղեկացնում է Caliber.Az-ը։

Հանդիպումների ընթացքում, որոնց մասնակցել է նաև Կատարի պետությունում Ադրբեջանի Հանրապետության արտակարգ և լիազոր դեսպան Ադիշ Մամեդովը, ընդգծվել է DIMDEX 2026 ցուցահանդեսի կարևորությունը երկրների ծովային պաշտպանության կարողությունների ընդլայնման առումով։

Կողմերը վստահություն են հայտնել ռազմական կապերի հետագա զարգացման կապակցությամբ և քննարկել Ադրբեջանի և Կատարի միջև ռազմական և ռազմատեխնիկական ոլորտներում համագործակցության ընդլայնման հեռանկարները՝ նշելով համատեղ զորավարժությունների անցկացման կարևորությունը, ինչպես նաև մտքերի փոխանակություն են իրականացրել փոխադարձ հետաքրքրություն ներկայացնող մի շարք այլ հարցերի շուրջ։