Ադրբեջանը դիվանագիտական հարաբերություններ է հաստատել Բոտսվանայի հետ

ՄԱԿ-ում Ադրբեջանի Հանրապետության մշտականներկայացուցիչ Թոֆիկ Մուսաևը և ՄԱԿ-ում Բոտսվանայի Հանրապետության մշտական ներկայացուցիչ Չարլզ Մասոլեն Նյու Յորքում ստորագրել են համատեղ հայտարարություն երկու երկրների միջև դիվանագիտական հարաբերություններ հաստատելու վերաբերյալ։

AZERTAC-ի փոխանցմամբ՝ փաստաթղթում արտահայտվում է Ադրբեջանի և Բոտսվանայի երկրների և ժողովուրդների միջև փոխըմբռնման և համագործակցության խթանման մտադրությունը։

Նաև ընդգծվում է, որ երկու երկրների կառավարությունները դիվանագիտական հարաբերություններ հաստատելիս հիմնվում են ՄԱԿ-ի կանոնադրության և միջազգային իրավունքի համընդհանուր ճանաչված նորմերի և սկզբունքների, մասնավորապես՝ պետական ինքնիշխանության, տարածքային ամբողջականության և ներքին գործերին չմիջամտելու սկզբունքների վրա։

Մշտական ներկայացուցիչները նաև նամակ են ուղարկել կազմակերպության գլխավոր քարտուղարին՝ համատեղ հայտարարությունը որպես ՄԱԿ-ի փաստաթուղթ տարածելու համար։