Ադրբեջանը երբեք չի մոռանա Իսրայելի աջակցությունը Դեսպան Մուխտար Մամեդովի հոդվածը՝ JPost-ում

«Անցյալ շաբաթ օրը Ադրբեջանում նշվող Հաղթանակի օրը պարզապես ազգային տոն չէ, այն հպարտության, բարոյական պարտքի և պատմական հիշողության խորհրդանիշ է»։

Ինչպես հաղորդում է Caliber.Az-ը, այս մասին ասվում է Իսրայելում Ադրբեջանի դեսպան Մուխտար Մամեդովի հոդվածում, որը հրապարակվել է իսրայելական The Jerusalem Post թերթում։

Դիվանագետի խոսքով՝ հաղթանակի ճանապարհը դժվար էր։ Նա նշել է, որ Ադրբեջանը երկար տարիներ գործել է գործնականում միայնակ՝ առանց միջազգային հանրության աջակցության։ Դեսպանն ընդգծել է, որ միջազգային մեխանիզմները, որոնք կոչված էին նպաստել հակամարտության կարգավորմանը, չկարողացան ապահովել իրական փոփոխություններ, դրա փոխարեն՝ պարզապես հավերժացրեցին ստատուս քվոն, ինչի հետ Ադրբեջանն այլևս չկարողացավ հաշտվել։

Հոդվածում նաև նշվում է, որ 2020 թվականի պատերազմից հետո Ադրբեջանի կողմից առաջ քաշված խաղաղության նախաձեռնությունը, որն ավարտվեց ԱՄՆ նախագահ Դոնալդ Թրամփի կողմից Վաշինգտոնում հրավիրված գագաթնաժողովով՝ նախագահ Իլհամ Ալիևի և Հայաստանի վարչապետի մասնակցությամբ, ցույց տվեց, որ խաղաղության ճանապարհը կարող է կառուցվել առանց ազգային արժանապատվությանը վնասելու։

«Այդ դժվար տարիներին մեզ աջակցել են մի քանի մտերիմ ընկերներ և գործընկերներ, որոնցից մեկը Իսրայելն էր, և Ադրբեջանը երբեք չի մոռանա դա», - ընդգծել է դեսպանը։