ԱՀ ԱԳՆ. Փաշինյանը մոլորեցնում է համաշխարհային հանրությանը

Փետրվարի 10-ին «Արմենպրես»-ում հրապարակված Հայաստանի վարչապետի հոդվածում տեղ գտած պնդումները, թե իբր Ադրբեջանը պատրաստվում է հարձակվել Հայաստանի վրա, Արևմտյան Ադրբեջան համայնքի նպատակների մասին պնդումները, ինչպես նաև մի շարք այլ անհիմն հայտարարություններ խեղաթյուրում են գործերի իրական վիճակը՝ համաշխարհային հանրությանը մոլորեցնելու նպատակով։

Ինչպես հաղորդում է Caliber.Az-ը, այս մասին ասել է Ադրբեջանի արտաքին գործերի նախարարության մամուլի քարտուղար Այխան Հաջիզադեն։

«Հետաքրքիր է, որ ռազմական ներուժ ունենալու իրավունքը պաշտպանող վարչապետը ներկայացնում է մի երկիր, որը 30 տարի ռազմական օկուպացիայի տակ է պահել ադրբեջանական հողերը և որը, չնայած Եռակողմ հայտարարությամբ ստանձնած պարտավորություններին, 44-օրյա պատերազմի ավարտից հետո երեք տարի զենք է մատակարարել օկուպացված տարածքներում գտնվող անօրինական կազմավորումներին։

44-օրյա պատերազմի ավարտից հետո Հայաստանի ռազմական ծախսերը գրեթե եռապատկվել են՝ 2021 թվականի մոտ 600 միլիոն դոլարից 2024 թվականին հասնելով 1,6 միլիարդ դոլարի։ Ավելին, վերջերս ստորագրված ռազմական պայմանագրերի համաձայն, Հայաստանը հիմնականում ձեռք է բերում հարձակողական զինատեսակներ, որոնք կարող են հեռահար հարվածներ հասցնել Ադրբեջանի տարածքին։ Նկատի ունենալով Հայաստանի Սահմանադրությամբ և իրավական ակտերում պահպանվող տարածքային պահանջները, ինչպես նաև ռևանշիզմի ուժեղացումը, այն փաստարկները, որոնցով Երևանը հիմնավորում է իր ռազմական ներուժի կուտակումը, անկեղծ չեն և ուղղակի վտանգ են ներկայացնում Ադրբեջանի անվտանգությանը»,- նշել է Հաջիզադեն։