Բաքվի դատարանում ՀՀ մեղադրյալ քաղաքացիների փաստաբանները հանդես են եկել պաշտպանական ելույթներով

Բաքվի ռազմական դատարանում այսօր Հայաստանի քաղաքացիների դեմ հարուցված քրեական գործով դատավարությունը շարունակվել է մեղադրյալների փաստաբանների ելույթներով։

AZERTAC-ի փոխանցմամբ՝ մեղադրյալ Դավիթ Իշխանյանի փաստաբան Ագշին Մամեդլին հայտարարել է, որ դատավճիռը պետք է կայացվի միայն անհերքելի ապացույցների հիման վրա և խնդրել դատարանին արդարացնել իր պաշտպանյալին։ Իշխանյանի երկրորդ պաշտպան Էլչին Ամիրովը աջակցել է Ագշին Մամեդլիին։

Մեղադրյալ Լևոն Բալայանի փաստաբան Վաֆա Մեհդիևան հայտարարել է, որ իր պաշտպանյալի գործողություններում բացակայում են հանցագործության տարրերը և, հետևաբար, խնդրել է դատարանին արդարացնել վերջինիս։ Բալայանի երկրորդ պաշտպան Սագի Մամեդովը աջակցել է Վաֆա Մեհդիևային։

Մեղադրյալ Դավիթ Ալլահվերդյանի փաստաբան Նիզամի Ալիևը հայտարարել է, որ իր պաշտպանյալը չի ընդունում մեղադրանքը։ Նա նշել է, որ Ալլահվերդյանի դեմ համոզիչ և հիմնավորված ապացույցներ չեն ներկայացվել և, հետևաբար, խնդրել է դատարանին արդարացնել նրան։ Ալլահվերդյանի երկրորդ պաշտպան Էլմադդին Մամեդովը նշել է, որ համակարծիք է իր գործընկերոջ հետ:

Մեղադրյալ Էրիկ Ղազարյանի պաշտպան Նաթիգ Մուստաֆաևը հայտարարել է, որ իր պաշտպանյալը չի ընդունում իր մեղքը՝ հիշեցնելով, որ նա հանձնել է զենքը և կամավոր հանձնվել Ադրբեջանի Զինված ուժերին։ Նա խնդրել է արդարացնել Ղազարյանին։