Բայրամովը հանդիպել է Սուրբ Աթոռի պետքարտուղարի հետ

Վատիկան կատարած պաշտոնական այցի շրջանակներում Ադրբեջանի արտաքին գործերի նախարար Ջեյհուն Բայրամովը հանդիպել է Սուրբ Աթոռի պետությունների և միջազգային կազմակերպությունների հետ կապի գծով պետքարտուղար, արքեպիսկոպոս Ռիչարդ Գալահերի հետ։

Report-ի փոխանցմամբ՝ այս մասին ասվում է Ադրբեջանի ԱԳՆ հաղորդագրության մեջ:

Հանդիպմանը քննարկվել են երկկողմ հարաբերությունների ներկա վիճակը և զարգացման հեռանկարները, տարածաշրջանային և միջազգային հարցեր, ինչպես նաև միջազգային հարթակներում Ադրբեջանի և Վատիկանի միջև համագործակցության հնարավորությունները։

Շեշտվել է բարձր մակարդակի այցելությունների ինտենսիվության պահպանման կարևորությունը երկկողմ համագործակցության հետագա խորացման առումով։ Այս համատեքստում ընդգծվել է Ադրբեջանի նախագահի պաշտոնական այցելությունների, ինչպես նաև այս տարվա հոկտեմբերին առաջին փոխնախագահ Մեհրիբան Ալիևայի Վատիկան կատարած այցի նշանակությունը։

Հանդիպմանը նախարարը իր զրուցակցին տեղեկացրել է ադրբեջանա-հայկական հարաբերությունների կարգավորման գործընթացի, Վաշինգտոնում ձեռք բերված պատմական պայմանավորվածությունների և դրանց իրականացման համար ձեռնարկվող գործնական քայլերի, ինչպես նաև տարածաշրջանում հետհակամարտային զարգացումների վերաբերյալ։