Հաջիզադեն՝ տարածաշրջանային հարցերում օտարերկրյա միջամտության մասին

Ադրբեջանի ԱԳՆ-ն տարածաշրջանային հարցերում երրորդ երկրների, այդ թվում՝ Ֆրանսիայի ապակայունացնող միջամտությունն անվանել է Հայաստանի հետ երկարաժամկետ խաղաղության հասնելու խոչընդոտներից մեկը։

Ինչպես հաղորդում է Report-ը, այս մասին X սոցիալական ցանցի իր էջում գրել է Ադրբեջանի ԱԳՆ մամուլի քարտուղար Այխան Հաջիզադեն՝ մեկնաբանելով Ֆրանսիայի արտգործնախարար Ժան-Նոել Բարոյի հայտարարությունները։

Հաջիզադեն ընդգծել է, որ Ադրբեջանն ու Հայաստանը առաջընթաց են գրանցել խաղաղության պայմանագրի տեքստի շուրջ աշխատանքում, սակայն այն ստորագրելու և տարածաշրջանում երկարաժամկետ խաղաղության հասնելու համար պետք է կատարվեն բոլոր պայմանները։ «Մասնավորապես, դա Ադրբեջանի նկատմամբ Հայաստանի տարածքային պահանջների վերացումն է, ինչը ամրագրված է այդ երկրի Սահմանադրության մեջ, ինչպես նաև ապակայունացնող արտաքին միջամտության դադարեցումը, այդ թվում՝ Ֆրանսիայի կողմից»,- նշել է ԱԳՆ ներկայացուցիչը։

Նրա խոսքով, Բարրոյի հայտարարությունները Հարավային Կովկասի տարածաշրջանում լարվածության վերաբերյալ բացահայտում են պաշտոնական Փարիզի կեղծավորությունը։

«Ֆրանսիայի կողմից Հայաստանին մահաբեր զենքի մատակարարումը, ինչպես նաև նրա երկարամյա հակաադրբեջանական դիրքորոշումը ոչ միայն չի նպաստում խաղաղությանը, այլև հակասում է Ժան-Նոել Բարոյի հայտարարություններին, որ իբր անհանգստացած է տարածաշրջանային լարվածությամբ: Այս երկակիությունը բացահայտում է Ֆրանսիայի կեղծավորությունը»,- գրել է Հաջիզադեն։