Իսմայիլզադե. Հնդկաստանի կողմից Հայաստանին զենքի մատակարարումները սպառնալիք են Ադրբեջանի ազգային անվտանգության համար

Հնդկաստանի կողմից Հայաստանին զենքի մատակարարումները, ինչպես նաև Երևանին ցուցաբերվող աջակցությունը խնդիր են ստեղծում Ադրբեջանի ազգային անվտանգության համար։

Ինչպես հաղորդում է Report-ը, այս մասին հայտարարել է Միլլի Մեջլիսի միջազգային հարաբերությունների և միջխորհրդարանական կապերի հանձնաժողովի անդամ Ֆարիզ Իսմայիլզադեն՝ «Գլոբալ Հարավի և Արևմուտքի վերելքը. Ադրբեջանի դերը, համագործակցության և զարգացման նոր հնարավորություններ» թեմայով քննարկումների ժամանակ:

«Հնդկաստանի կողմից Հայաստանին ցուցաբերվող աջակցությունը, զինումը, հրթիռների և այլ սարքավորումների մատակարարումը խնդիր է ստեղծում մեր ազգային անվտանգության համար», - նշել է նա։

Իսմայիլզադեի խոսքով՝ Ադրբեջանի հեղինակությունը աշխարհում արագորեն աճում է։

«Հատկապես COP29-ի ընթացքում, Չմիավորման շարժման կազմակերպությունում նախագահության ընթացքում և բազմակողմ դիվանագիտության այլ ոլորտներում, Ադրբեջանի նկատմամբ հարգանքը զգալիորեն աճել է։ Սա ադրբեջանցի դիվանագետների նվաճումն է», - ասել է Իսմայիլզադեն։