Իտալական լրատվամիջոցները լայնորեն լուսաբանել են Մատարելլայի այցը Ադրբեջան ԼՈՒՍԱՆԿԱՐ

Իտալական լրատվամիջոցները լայնորեն լուսաբանել են Իտալիայի նախագահ Սերջիո Մատարելլայի պաշտոնական այցը Ադրբեջան։

AZERTAC-ի փոխանցմամբ՝ ANSA, RAI, Aise, Il Quaderno, Italpress, Il Sole 24C, Formiche, Gazzetta Diplomatica, Il Punto Notizie և Virgilio տեղեկատվական ռեսուրսներում հրապարակված նյութերում նշվում է, որ Բաքու կատարած այցի երկրորդ օրը Սերջիո Մատարելլան, Ադրբեջանի նախագահ Իլհամ Ալիևի և առաջին տիկին Մեհրիբան Ալիևայի հետ միասին, մասնակցել է Իտալա-ադրբեջանական համալսարանի առաջին ակադեմիական մասնաշենքերի բացմանը։

Ընդգծվում է, որ Սերջիո Մատարելլան հպարտ է, որ իր երկիրը այս նախագիծն իրականացնում է Ադրբեջանի հետ համատեղ, ինչը արտացոլում է երկու երկրների միջև աճող, ինտենսիվ և լայն բարեկամությունը։ Իտալիայի նախագահը այս նախաձեռնությունն անվանել է Ադրբեջանի հետ համագործակցության գագաթնակետ՝ նշելով, որ այն մարմնավորում է տարբեր ձևերով և ոլորտներում կառուցված գործընկերությունը։

Սերջիո Մատարելլան նաև ընդգծել է, որ հաշվի առնելով միջազգային ներկայիս իրավիճակը, որը բնութագրվում է ծանր հակամարտություններով և բախումներով, իր երկիրը ուրախ է համագործակցել Ադրբեջանի հետ, և որ միջազգային մակարդակով զգալի համատեղ աշխատանք է տարվում։