Մեհմեթ Յուջե. Զանգեզուրը ռազմավարական նշանակություն ունեցող տարածաշրջան է Արևմուտք այլընտրանքային էներգիա արտահանելու համար

Զանգեզուրի շրջանը ռազմավարական տեսակետից ամենակարևորներից մեկն է Արևմուտք այլընտրանքային էներգիայի արտահանման առումով, և սա ամբողջ թյուրքական աշխարհի ընդհանուր նախագիծն է։

Ինչպես հաղորդում է Report-ը, այս մասին Բաքվում ընթացող Թյուրքական աշխարհի միջազգային տնտեսական համաժողովում հայտարարել է Ուլուդաղի համալսարանի դասախոս, Թուրքիայի շրջակա միջավայրի պաշտպանության գործակալության փոխնախագահ Մեհմեթ Յուջեն։

Նրա խոսքով՝ Զանգեզուրի միջանցքին վերաբերող նախագծերը տեխնոլոգիապես հավասարակշռված են, և տարածաշրջանում արդեն իսկ ձեռնարկվում են կոնկրետ քայլեր համատեղ ներդրումների և համագործակցության ուղղությամբ։

«Այս նախագծերը ռազմավարական նշանակություն ունեն էներգետիկայի, լոգիստիկայի և թյուրքական պետությունների միջև միասնության ամրապնդման առումով», - ընդգծել է Յուջեն։

Իր ելույթի ընթացքում Մեհմեթ Յուջեն նաև շնորհակալություն է հայտնել Ադրբեջանի նախագահ Իլհամ Ալիևին. «Իրականությունը, որի մասին մենք տարիներ շարունակ երազել ենք, այսօր կյանքի է կոչվում: «Թյուրքական աշխարհը մեր ընտանիքն է» արտահայտությունը պարզապես արտահայտություն չէ: Այս հասկացության հետևում խորը իմաստ կա, և այն պետք է քննարկվի ակադեմիական մակարդակով»: