«Երևանը պետք է կատարի իր ստանձնած պարտավորությունները» Այխան Հաջիզադեն՝ Զանգեզուրի միջանցքի մասին

Ադրբեջանը միշտ շահագրգիռ կողմ է եղել տարածաշրջանում հաղորդակցությունների բացման հարցում։
 
Այս մասին Report-ին տված հարցազրույցում ասել է՝ Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեն։
 
«Ադրբեջանի, Ռուսաստանի Դաշնության և Հայաստանի ղեկավարների՝ 2020 թվականի նոյեմբերի 10-ի եռակողմ հայտարարության շրջանակներում՝ երկար ժամանակ ջանքեր են գործադրվում այդ գործընթացն առաջ մղելու համար։ Հայկական կողմը որոշակի պարտավորություններ է ստանձնել այս փաստաթղթի շրջանակներում։ Եռակողմ հայտարարության 9-րդ պարբերությունում հստակ նշված է, թե ինչ պարտավորություններ ունի Հայաստանը և ինչպես է կազմակերպվելու տրանսպորտային հաղորդակցությունների նկատմամբ վերահսկողությունը։ Սակայն  շուրջ 4 տարի Հայաստանը չի կատարում իր գրավոր պարտավորությունները՝ կապված Ադրբեջանի արևմտյան շրջանները Նախչըվանի Ինքնավար Հանրապետության հետ կապող հաղորդակցությունների բացման հետ։
 
Ադրբեջանը շարունակում է ենթակառուցվածքային և տրանսպորտային կարևոր նախագծերի իրականացումը օկուպացիայից ազատագրված տարածքներում։ Վերջին չորս տարիների ընթացքում Երևանը միայն փորձել է խոչընդոտել գործընթացին։ Հաշվի առնելով դա՝ Ադրբեջանը դիտարկել է նաև՝ հաղորդակցությունների բացման այլընտրանքային ուղիներ։ Օրինակ, Ադրբեջանը պայմանագիր է ստորագրել Իրանի տարածքով ճանապարհի և երկաթուղու կառուցման մասին, որը ուղիղ տրանսպորտային կապ կապահովի Նախչըվանի Ինքնավար Հանրապետության հետ։ Այս տարիների ընթացքում կատարված աշխատանքը կապացուցի, որ Ադրբեջանը, ի տարբերություն Հայաստանի, նշանակալի ավանդ է ներդնում տարածաշրջանում տրանսպորտային միջանցքների զարգացման գործում։
 
Եթե ​​հայկական կողմն իսկապես շահագրգռված է տարածաշրջանում հաղորդակցությունների բացմամբ, ապա պետք է կատարի իր ստանձնած պարտավորությունները։ Իր ապակառուցողական դիրքորոշմամբ Երևանը ևս մեկ անգամ ապացուցում է, որ ինքնամեկուսացման քաղաքականություն է վարում»,- ասել է Ա.Հաջիզադեն։