Բաքվի դատարանում Բալայանը խոստովանել է, որ մասնակցել է Վարդանյանի կողմից ֆինանսավորվող զինված միավորմանը

Բաքվի ռազմական դատարանում այսօր շարունակված դատավարության ընթացքում ընթերցվել են՝ մեղադրյալ Լևոն Բալայանի նախաքննության ընթացքում տված ցուցմունքները, ինչպես նաև քրեական գործի վերաբերյալ այլ փաստաթղթեր։
 
AZERTAC-ի տվյալներով՝ Բալայանի ցուցմունքներիի համաձայն՝ 1995 թվականի հունվարին նա անցել է զինվորական ծառայության և մինչև 1998 թվականը ծառայել է որպես շարքային Շուշայի, Խանքենդիի և Խոջալուի զորամասերում։ Ծառայության ընթացքում նրան տրամադրվել է «KS-74»  ինքնաձիգ։ Զորամասերը, որոնցում նա ծառայել է, հագեցված են եղել ռուսական արտադրության BMP-1 և BMP-2 հետևակի մարտական ​​մեքենաներով, T-55 և T-72 տանկերով։ Բալայանը նշել է, որ հրամանատարներից մեկը՝ Լևոն Մնացականյանը (մեղադրյալը և ներկայումս կալանքի տակ է), հաճախ է այցելել զորամասեր և ստուգել մարտական ​​պատրաստվածությունը։
 
2020 թվականի սեպտեմբերի 20-ին Լևոն Բալայանը զորակոչվել է «Խանքենդիի զինվորական կոմիսարիատի» կողմից՝ ծառայելու «զինված ուժերում», և 44-օրյա պատերազմի առաջին օրերին, այսինքն՝ սեպտեմբերի 27-ից մինչև հոկտեմբերի 2-ը, նա մասնակցել է մարտերին՝ Սուգովուշան գյուղի «պաշտպանության 3-րդ գծում» գտնվող զինված կազմավորման կազմում։ Գումարտակը, որում նա ծառայել է, կոչվում էր «Ալաշա»։
 
Հետաքննությանը տված իր ցուցմունքում Բալայանը նշել է, որ 2023 թվականի մայիսի 1-ին միացել է՝ Ռուբեն Վարդանյանի կողմից Ադրբեջանի օկուպացված տարածքներում ստեղծված և ֆինանսավորվող զինված կազմավորումներից մեկին։ Այդ ժամանակվանից սկսած նա ամսական ստանում էր 170 հազար դրամ (700 դոլար) աշխատավարձ, որը մուտքագրվում էր «Արցախբանկի» քարտին (Հայաստանի բանկ - խմբ.)։ Սեպտեմբերի 20-ին նա ձերբակալվել է ադրբեջանցի զինվորականների կողմից։