Բաքվի դատարանում Մանուկյանը պատմել է ադրբեջանական տարածքների ականապատման մասին

Բաքվի ռազմական դատարանում այսօրվա դատավարության ժամանակ մեղադրյալ Դավիթ Մանուկյանը պատասխանել է պետական ​​մեղադրողի հարցերին՝ կապված Ադրբեջանի այն տարածքների ականապատման հետ, որոնք գտնվում էին հայկական օկուպացիայի տակ։
 
Ինչպես հաղորդում է AZERTAC-ը, ՀՀ քաղաքացի Դավիթ Մանուկյանը, որը ծառայել է այս երկրի զինված ուժերում գեներալ-մայորի կոչումով և զբաղեցրել է տարբեր պաշտոններ, պատմել է հետևյալը. «Համեմատաբար խաղաղ ժամանակահատվածում, երբ ես զորամասի հրամանատար էի, եղել են ականների հետ կապված միջադեպեր (նկատի ունի ականապատումը - խմբ.): Չնայած ոչ մեծ մասշտաբի, դրանք եղել են: Կային հստակ հրահանգներ ֆորմուլյարների և քարտեզների վերաբերյալ: Յուրաքանչյուր ականապատումից առաջ բարձրագույն հրամանատարությունը հրաման էր տալիս»:
 
Նրա խոսքով՝ հրամանում հստակ նշված էր, թե  ականային քարտեզների, ֆորմուլյարների և սխեմաների քանի օրինակ պետք է պատրաստվի։ «Այնտեղ նշված էին հասցեները, թե որտեղ և ինչ պետք է ուղարկվի։ Մենք գործել ենք այդ հրամանների հիման վրա», - ասել է մեղադրյալը։
 
Նշենք, որ Բաքվում շարունակվում է խաղաղության և մարդկության դեմ հանցագործությունների, պատերազմական հանցագործությունների, այդ թվում՝ ագրեսիվ պատերազմի նախապատրաստման և վարման, ցեղասպանության, պատերազմի օրենքների և սովորույթների խախտման, ահաբեկչության, ահաբեկչության ֆինանսավորման, իշխանության բռնի զավթման և պահպանման, ինչպես նաև բազմաթիվ այլ հանցագործությունների մեջ մեղադրվող Հայաստանի քաղաքացիների դատավարությունը։