Բայրամով. Բաքուն գործնական քայլեր է ակնկալում Երևանից և Փարիզից՝ դրոշների պղծման հետ կապված միջադեպերի վերաբերյալ

Ադրբեջանը մտահոգված է Հայաստանում շարունակվող ռևանշիստական ​​տրամադրություններով։
 
Ինչպես հաղորդում է Report-ը, այս մասին հայտարարել է Ադրբեջանի արտաքին գործերի նախարարության ղեկավար Ջեյհուն Բայրամովը Բաքվում՝ ԵՄ դիվանագիտության ղեկավար Կայա Կալլասի հետ համատեղ մամուլի ասուլիսում։
 
Նրա խոսքով՝ Հայաստանի շարունակվող ռազմականացումը սպառնալիք է ստեղծում նաև Հարավային Կովկասի տարածաշրջանի անվտանգության համար:
 
«Երկու օր առաջ Հայաստանում տեղի ունեցած զանգվածային երթի ժամանակ՝ Ադրբեջանի և Թուրքիայի նկատմամբ ատելությամբ լի կոչեր են հնչեցվել։ Այնտեղ նաև այրվել են Ադրբեջանի և Թուրքիայի դրոշները, սա բացարձակապես անընդունելի է։ Ցավոք, նմանատիպ գործողություններ երեկ տեղի են ունեցել նաև Ֆրանսիայի մայրաքաղաք Փարիզում, թեև ավելի փոքր մասշտաբով», -  հայտարարել է Բայրամովը։
 
Նախարարը ընդգծել է, որ այլ երկրների պետական ​​խորհրդանիշների պղծումը հանցագործություն է, այդ թվում՝ այս երկու երկրների օրենքների համաձայն։ «Բաքուն ակնկալում է գործնական քայլեր Հայաստանի և Ֆրանսիայի կառավարություններից՝ համաձայն իրենց օրենսդրության՝ այս միջադեպերի վերաբերյալ։ Իշխանությունները պետք է կանխեն նման գործողությունները, որոնք ամոթալի են հասարակության համար», - հավելել է նա: