Իտալիայի ԱԳՆ փոխղեկավար. Ադրբեջանի դեմ ԵԽ բանաձևը լի է կեղծումներով

Հոկտեմբերի 24-ին Ադրբեջանի դեմ ընդունված Եվրախորհրդարանի բանաձևը կողմնակալ է և լի պատմական փաստերի կեղծումներով։
 
Ինչպես հաղորդում է Report-ը՝ Agenzia Nova-ին հղումով, այս մասին հայտարարել է՝ Իտալիայի արտաքին գործերի և միջազգային համագործակցության փոխնախարար Էդմոնդո Չիրիելին։
 
Նա նշել է, որ առաջին հերթին բանաձևը լի է իրավական և պատմական փաստերի կեղծումներով։
 
«Ես զարմացած եմ Եվրախորհրդարանի ընդունած բանաձևից՝ ուղղված Ադրբեջանի դեմ։ Հայաստանն էր, որ երեսուն տարի պահել և օկուպացրել էր ոչ միայն Ղարաբաղը, այլև միայն ադրբեջանցիներով բնակեցված տարածքը։ Ադրբեջանը մեղավոր չէ, որ հայերը լքել են տարածաշրջանը, սակայն, ինչպես վկայում են ՄԱԿ-ի անկախ զեկույցները, դա տեղի է ունեցել տեղի հայ անջատողականների որոշմամբ։ Միջազգայնորեն ճանաչված ադրբեջանական տարածքում բնակվող հայերին պաշտպանելու պատրվակով Հայաստանի կողմից սկսված պատերազմի պատճառով ավելի քան 750 հազար ադրբեջանցիներ ստիպված են եղել լքել տարածաշրջանը։ Այդ ադրբեջանցիները դեռ չեն կարողանում վերադառնալ իրենց հողեր, քանի որ նրանց քաղաքները ավերվել են, իսկ տարածքը շարունակում է մնալ խիստ ականապատված»,- ասել է փոխարտգործնախարարը։
 
Նա հավելել է, որ Հայաստանի տարածքում Ադրբեջանի զինված ուժեր չկան։ «Եվրախորհրդարանի կողմից ընդունված բանաձևը, անշուշտ, չի նպաստում երկու երկրների միջև խաղաղության պայմանագրի շուտափույթ ստորագրմանը»,- ընդգծել է փոխնախարարը։