Շտայնմայեր. Ադրբեջանը վերածվել է մի հանգույցի, որտեղ հատվում են կարևոր առևտրային ուղիները

Գերմանիան մեծ նշանակություն է տալիս՝ Անդրկասպյան միջազգային տրանսպորտային երթուղու (ԱՄՏԵ– Միջին միջանցք) նախագծին։
 
Ինչպես հաղորդում է Report-ը, այս մասին հայտարարել է Գերմանիայի նախագահ Ֆրանկ-Վալտեր Շտայնմայերը, հանդես գալով՝ Ադրբեջանի նախագահ Իլհամ Ալիևի հետ մամուլի համար համատեղ հայտարարությամբ։
 
Նրա խոսքով, Ադրբեջանը դարձել է հանգույց, որտեղ հատվում են կարևոր առևտրային ուղիները։
 
«Բեռլինը  հանդես է գալիս՝ տրանսպորտի ոլորտում համագործակցության զարգացման օգտին: Ադրբեջանը կարող է կարևոր դեր խաղալ Կենտրոնական Ասիայի, Հեռավոր Արևելքի և Չինաստանի հետ մեր տրանսպորտային կապերի զարգացման գործում: Այս տեսանկյունից Միջին միջանցքը կարևոր նախագիծ է գերմանական տնտեսության համար»,- ընդգծել է նա:
 
Շտայնմայերը նաև ընդգծել է, որ Հարավային Կովկասում կայուն խաղաղությունն ու կայունությունը էլ ավելի մեծ ազդակ կհաղորդեն տարածաշրջանի տնտեսական զարգացմանը։