«Վերջնական որոշում դեռ չի կայացվել» Հաջիևը՝ Գազայում կայունացման ուժերին Ադրբեջանի մասնակցության մասին

Ադրբեջանի նախագահի օգնական, նախագահի աշխատակազմի արտաքին քաղաքականության հարցերի բաժնի ղեկավար Հիքմեթ Հաջիևը կասկածներ է հայտնել երկրի՝ Գազայում տեղակայվելիք միջազգային ուժերին միանալու վերաբերյալ։
 
Այս մասին հայտնել է Сaliber.Az-ը՝ հղում անելով բրիտանական Middle East Eye (MEE) պորտալին։
 
Հաջիևը հայտարարել է, որ Բաքվի համար դժվար կլինի մասնակցել՝ ԱՄՆ-ի միջնորդությամբ հրադադարի պլանի շրջանակներում տեղակայվող ուժերին՝ նշելով մանդատի շրջանակի վերաբերյալ հարցեր։
 
Ճապոնական Nikkei թերթին տված հարցազրույցում նա ասել է, որ Վաշինգտոնը դիմել է Բաքվին՝ Միջազգային կայունացման ուժերի կազմում ադրբեջանական զորքեր ընդգրկելու առաջարկով։
 
«Վերջնական որոշում դեռ չի կայացվել», - ասել է Հաջիևը։
 
ՄԱԿ-ի Անվտանգության խորհուրդը հաստատել է այս ուժերի ստեղծման մասին բանաձևը՝ ապահովելով Թուրքիայի, Կատարի, Եգիպտոսի, ԱՄԷ-ի, Սաուդյան Արաբիայի, Ինդոնեզիայի, Պակիստանի և Հորդանանի կողմից պաշտոնական աջակցությունը։ Սակայն այդ ժամանակից ի վեր քիչ առաջընթաց է գրանցվել։
 
Հաջիևը մտահոգություն է հայտնել, որ Անվտանգության խորհրդի բանաձևը «չի անդրադառնում Գազայում գործողությունների կոնկրետ կանոններին, ընթացակարգերին և առաքելության մանդատի շրջանակին վերաբերող հարցերին»։
 
Նա նաև նշել է, որ Ադրբեջանը պատերազմ է մղել հարևան Հայաստանի հետ մինչև 2023 թվականը, և դժվար կլինի համոզել բնակչությանը լրացուցիչ զորքեր մոբիլիզացնել։
 
Ուժը պատասխանատու կլինի՝ Գազայում անվտանգության պահպանման, տարածքի ապառազմականացման և պաղեստինյան ոստիկանական ուժերի վերապատրաստման համար։