Ադրբեջանը բողոքի է հայտնել բրիտանացի պատգամավորներին

Ադրբեջան-Մեծ Բրիտանիա միջխորհրդարանական հարաբերությունների աշխատանքային խմբի ղեկավար Ֆարիզ Իսմայիլզադեն բողոքի նամակ է հղել Մեծ Բրիտանիայի խորհրդարանի պատգամավորներ Ջիմ Շենոնին և լորդ Ալտոնին՝ ի պատասխան նրանց 2025 թվականի հունիսի 18-ի «Շվեյցարական խաղաղության նախաձեռնությանը» աջակցելու հրապարակային կոչի։
 
Ինչպես հաղորդում է Report-ը, նամակում ընդգծվում է.
 
«Մենք բարձր ենք գնահատում միջազգային հանրության հետաքրքրությունը ՝մեր տարածաշրջանում խաղաղություն և կայունություն ապահովելու հարցում։ Այնուամենայնիվ, կայուն խաղաղության հասնելուն ուղղված հայտարարություններն ու նախաձեռնությունները պետք է հիմնված լինեն փաստերի, միջազգային իրավունքի, ինքնիշխանության և տարածքային ամբողջականության սկզբունքների վրա։ «Լեռնային Ղարաբաղի» վերաբերյալ այսպես կոչված «Շվեյցարական խաղաղության նախաձեռնությանը» աջակցելու Ձեր կոչի կապակցությամբ (հիշեցնում ենք, որ Ադրբեջանում այս անվանմամբ վարչական միավոր չկա), անհրաժեշտ ենք համարում Ձեզ ուշադրությանը հասցնել օբյեկտիվ տեղեկատվություն»։
 
Նամակում հիշեցվում է, որ Հայաստանի կողմից Ղարաբաղի օկուպացիայի հետևանքով մոտ մեկ միլիոն ադրբեջանցիներ ստիպված են եղել լքել իրենց տները։ Օկուպացիան ուղեկցվել է ծանր հանցագործություններով, այդ թվում՝ Խոջալուի ցեղասպանությամբ, քաղաքների և գյուղերի ավերումով, մշակութային և կրոնական ժառանգության ոչնչացմամբ, ինչպես նաև շրջակա միջավայրի վնասով։ Ընդգծվում է, որ միջազգային հանրությունը տարիներ շարունակ անտեսել է Ադրբեջանի  հարկադիր վերաբնակների տառապանքները։ Նաև նշվում է, որ Հայաստանը դիտավորյալ ականապատել է օկուպացված տարածքները, ինչի արդյունքում Ադրբեջանը դարձել է աշխարհի ամենաշատ ականապատված երկրներից մեկը։ Ականները շարունակում են սպանել և հաշմանդամ դարձնել խաղաղ բնակիչներին, խոչընդոտել տեղահանվածներին  վերադարձին և վերականգնման աշխատանքներին։