Ադրբեջանը դարձել է ՅՈՒՆԵՍԿՕ-ի հերթական կոմիտեի անդամ

Ադրբեջանն ընտրվել է՝ ՅՈՒՆԵՍԿՕ-ի՝ զինված հակամարտությունների դեպքում մշակութային արժեքների պաշտպանության կոմիտեի անդամ՝ 2025-2029 թվականների համար։
 
Report-ի փոխանցմամբ՝ այս մասին հայտնել են Ադրբեջանի արտաքին գործերի նախարարության մամուլի ծառայությունից։
 
Ընտրությունները  անցկացվել են՝ Հաագայի կոնվենցիայի զինված հակամարտությունների դեպքում մշակութային արժեքների պաշտպանության մասին երկրորդ արձանագրության մասնակից պետությունների 16-րդ հանդիպման ժամանակ, որը տեղի է ունեցել դեկտեմբերի 1-2-ը։
 
Վեց երկիր, այդ թվում՝ Ադրբեջանը, մրցել են չորս թափուր տեղի համար։ Մրցակցային ընտրություններից հետո Ադրբեջանը ստացել է ձայների մեծամասնությունը առաջին փուլում։
 
Նշենք, որ այս կոմիտեն ստեղծվել է զինված հակամարտությունների ժամանակ մշակութային արժեքների պաշտպանությունն ապահովելու, 1954 թվականի Հաագայի կոնվենցիայի և դրա երկրորդ արձանագրության պահանջների կատարումը վերահսկելու և այս ոլորտում պետություններին տեխնիկական, իրավական և ինստիտուցիոնալ աջակցություն ցուցաբերելու  նպատակով։