Ադրբեջանը կոչ է արել Հայաստանին՝ արագացնել խաղաղության համաձայնագրի ստորագրումը ԼՈՒՍԱՆԿԱՐ

Ադրբեջանական կողմը կոչ է արել հայկական կողմին՝ արագացնել խաղաղության համաձայնագրի ստորագրման գործընթացը և նշել, որ այդ հնարավորությունը հավերժ չի լինելու։
 
Ինչպես հաղորդում է Caliber.Az-ը՝ հղում անելով արգենտինական Perfil հրատարակությանը, այս մասին հայտարարել է՝ այցով Բուենոս Այրեսում գտնվող Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը։
 
«Հայաստանին համաձայնության գնալու դրդող գործոններից մեկը նրա գիտակցումն է, որ այս հնարավորությունը հավերժ չի լինի, և սխալ կլինի այն բաց թողնել»,- հայտարարել է Ամիրբեկովը։
 
Նրա խոսքով, Բաքվի և Երևանի միջև խաղաղության համաձայնագրի տեքստի շուրջ այս ամիս ավարտված բանակցությունները ճանապարհ են բացում՝ հարաբերությունների կարգավորման և դիվանագիտական ​​կապերի հաստատման համար։ Սակայն  դրա համար Հայաստանը պետք է փոփոխություններ կատարի  իր սահմանադրության մեջ, հրաժարվի տարածքային պահանջներից և օտարերկրյա ուժերը դուրս բերի սահմանամերձ շրջաններից։
 
«Այս համաձայնագիրը ոչ թե վերջն է, այլ սկիզբը, խաղաղությունը կառուցվում է ոչ թե հայտարարությունների, այլ կոնկրետ քայլերի վրա»,- ընդգծել է ադրբեջանցի պաշտոնյան։