Բաքվի դատարանում ցուցադրվել է Փաշինյանի և Հարությունյանի մասնակցությամբ տեսանյութ՝ Թովուզի մարտերից հետո կազմակերպված միջոցառման ժամանակ

Բաքվի ռազմական դատարանում այսօրվա դատական ​​նիստում շարունակվել է՝ Հայաստանի  քաղաքացիների դեմ հարուցված քրեական գործով փաստաթղթերի ընթերցումը։
 
AZERTAC-ի փոխանցմամբ, 2020 թվականի Թովուզի իրադարձություններից (Թովուզի մարտեր - խմբ.) հետո պատրաստված տեսանյութը՝ լսումների ժամանակ ուսումնասիրվել է մեղադրյալ Դավիթ Իշխանյանի խնդրանքով։ Հիշեցնենք, որ հոկտեմբերի 24-ի դատական ​​նիստում Իշխանյանի փաստաբանը միջնորդություն է ներկայացրել տվյալ տեսանյութը ուսումնասիրելու համար։
 
Դատարանում ցուցադրվել է 2020 թվականի օգոստոսի 28-ին YouTube սոցիալական ցանցում տեղադրված տեսանյութը։ Տեսանյութում երևում է, թե ինչպես է ՀՀ վարչապետ Նիկոլ Փաշինյանը Սարդարապատում պարգևատրում հայ զինծառայողներին։ Միջոցառմանը, որին մասնակցել է նաև Արայիկ Հարությունյանը, Նիկոլ Փաշինյանը հայտարարել է, որ բոլոր պարգևատրվածները հուլիսյան մարտերի ակտիվ մասնակիցներ են եղել։
 
Պետական ​​մեղադրող Վուսալ Աբդուլլաևը դիմել է մեղադրյալ Արայիկ Հարությունյանին։ Նա նախ նշել է, որ տեսանյութում երևում է, թե ինչպես են պարգևատրվում հուլիսյան մարտերին մասնակցած հայ զինծառայողները։ «Ի՞նչ նպատակով և ի՞նչ կարգավիճակով եք դուք հրավիրվել այս միջոցառմանը։ 2020 թվականի հունիսի 19-ին տեղի է ունեցել Հայաստանի Անվտանգության խորհրդի և ինքնահռչակ կազմավորման համատեղ նիստ։ Ո՞րն էր այնտեղ ձեր մասնակցության նպատակը։ Դատավարության ընթացքում դուք հայտարարել եք, որ հուլիսյան մարտական ​​գործողությունները որևէ կապ չունեն ինքնահռչակ ռեժիմի հետ։ Ինչո՞ւ է հրավիրվել այդ նիստը, և ի՞նչ հարցեր են քննարկվել»։
 
Մեղադրյալը պատասխանել է, որ անօրինական կազմավորման «ներկայացուցիչները» մշտապես հրավիրվում էին Հայաստանում անցկացվող նմանատիպ միջոցառումների։ Նիստերի ժամանակ քննարկվել են Հայաստանի անվտանգության, բանակի մարտունակության և հնարավոր պատերազմական սցենարների հարցեր։