Բուրխանովը՝ ուզբեկա-ադրբեջանական հարաբերությունների դինամիկայի մասին

Ուզբեկստանը նպատակ ունի Ադրբեջանի հետ իրականացնել նոր համատեղ նախագծեր, ակտիվացնել գործարար կապերը և ամրապնդել ռազմավարական գործընկերությունը։

Այս մասին Caliber.Az-ին ասել է Ուզբեկստանի արտաքին գործերի նախարարի խորհրդական, ԱԳՆ մամուլի քարտուղար Ահրոր Բուրխանովը՝ մեկնաբանելով նախագահ Շավքաթ Միրզիյոևի հուլիսի 2-4-ը Ադրբեջան կատարած պետական այցը։

Նա նշել է, որ պաշտոնական Տաշքենդը բարձր է գնահատում ուզբեկա-ադրբեջանական հարաբերությունների դինամիկան. «Այսօր դրանք ցույց են տալիս կայուն աճ բոլոր ոլորտներում»։

Խոսելով միջազգային համագործակցության մասին՝ նախարարի խորհրդականը հատուկ նշել է, որ Ուզբեկստանը մեծ նշանակություն է տալիս կառուցողական փոխգործակցությանը այնպիսի կազմակերպությունների շրջանակներում, ինչպիսիք են Տնտեսական համագործակցության կազմակերպությունը (ՏՀԿ) և Թյուրքական պետությունների կազմակերպությունը (ԹՊԿ)։

«Այս բազմակողմ կառույցները ծառայում են որպես կարևոր հարթակներ համաձայնեցված նախաձեռնությունները առաջ տանելու, ինտեգրացիոն գործընթացների խորացման և մշակութային ու մարդասիրական կապերի ամրապնդման համար», - նշել է Բուրխանովը։