Euronews-ը ռեպորտաժ է պատրաստել Մեհրիբան Ալիևայի Վատիկան այցի մասին

Euronews-ը ռեպորտաժ է պատրաստել՝ Ադրբեջանի առաջին փոխնախագահ Մեհրիբան Ալիևայի Վատիկան կատարած այցի մասին։
 
Report-ի փոխանցմամբ՝ «Ադրբեջանը ամրապնդում է կապերը Վատիկանի հետ Սուրբ Աթոռում կատարվող վերականգնման աշխատանքների միջոցով» վերնագրով հոդվածում նշվում է, որ Մեհրիբան Ալիևայի այցը կարևոր քայլ է՝ Ադրբեջանի և Վատիկանի միջև երկկողմ հարաբերությունների զարգացման գործում։
 
Ընդգծվում է, որ Վատիկանի պաշտոնատար անձինք  բարձր են գնահատել՝ Ադրբեջանի դերը համաշխարհային ժառանգության պահպանման և միջկրոնական երկխոսության ամրապնդման գործում։ Մասնավորապես, Ադրբեջանը աջակցում է Վատիկանում պատմական կատակոմբների վերականգնմանը, ինչպես նաև Բաքվում նոր կաթոլիկ եկեղեցու կառուցմանը։
 
Հոդվածում նշվում է, որ Ադրբեջանի առաջին փոխնախագահը մասնակցել է Կոմոդիլյա կատակոմբների՝ 4-րդ դարի հին քրիստոնեական համալիրի վերականգնման նախագծի բացմանը։ Վերականգնումը իրականացվել է Հեյդար Ալիևի հիմնադրամի կողմից՝ 2021 թվականի մարտի 4-ին Սրբազան հնագիտության պապական հանձնաժողովի հետ կնքված համաձայնագրի համաձայն։
 
18-րդ դարում հայտնաբերված և հնագետների կողմից 1900 թվականին առաջին անգամ պեղված կատակոմբները պարունակում են վաղ քրիստոնեական արտեֆակտներից մի քանիսը և ավանդաբար համարվում են վաղ քրիստոնյա նահատակներ Ֆելիքսի և Ադավկտաի թաղման վայրը: Միջնադարում դրանք կարևոր ուխտագնացության վայր էին հավատացյալների համար: Փխրուն որմնանկարները պահպանելու և ստորգետնյա պատերը ամրացնելու համար վերականգնման աշխատանքներ են իրականացվել լազերային և նանոտեխնոլոգիական մեթոդներով։
 
Euronews-ը նշում է, որ այցի ընթացքում Մեհրիբան Ալիևան հանդիպել է Հռոմի պապ Լևոն XIV-ի հետ, ով ընդգծել է Ադրբեջանի հետ միջկրոնական երկխոսության կարևորությունը: Նա հանդիպել է նաև Վատիկանի քաղաք-պետության գլխավոր քարտուղար, միանձնուհի Ռաֆայելլա Պետրինիի հետ: Որպես բարեկամության և համատեղ մշակութային ժառանգության նշան՝ նրանք տնկել են խորհրդանշական նռան ծառ: