Հաջիզադեն՝ Փաշինյանին. Ձեր փաստարկը չի կարող համարվել Հայաստանի «բարի մտադրությունների» հաստատում

Ադրբեջանի արտաքին գործերի նախարարության մամուլի քարտուղար Այխան Հաջիզադեն արձագանքել է ՀՀ վարչապետ Նիկոլ Փաշինյանի գրառմանը Х սոցցանցում:

Ինչպես հայտնում է Caliber.Az-ը, Հաջիզադեն իր պատասխանը հրապարակել է X-ի իր էջում։

«Ուրեմն ի՞նչ է իրականում այս ամենը նշանակում:

Պարոն վարչապետ, թող ձեր գործողություններն ավելի բարձր խոսեն, քան խոսքը։

Հետաքրքիր է, որ ձեր «խաղաղասեր նարատիվը» շրջանցում է տարածաշրջանում կայուն խաղաղության և կայունության հաստատման ամենակարևոր հենասյունը՝ հարգանքը պետությունների տարածքային ամբողջականության և ինքնիշխանության նկատմամբ:

Եթե Հայաստանն իսկապես շահագրգռված է իր հարևանների հետ խաղաղության կառուցմամբ, ապա ինչու՞ չեք ուզում ամեն գնով սկսել այն տարածքների նկատմամբ պահանջներից հրաժարվելու գործընթացը, որոնք դուք բոլորդ անվանում եք «Արևմտյան Հայաստան» և «Լեռնային Ղարաբաղի Հանրապետություն» ինչպես դա ամրագրված է ձեր Սահմանադրության և ազգային օրենսդրության մեջ:

Կներեք, բայց ձեր փաստարկները չեն կարող դիտարկվել որպես Հայաստանի «բարի մտադրությունների» հաստատում»,- գրել է Հաջիզադեն։