Միլլի Մեջլիսի ընտրություններ. Ադրբեջանում «լռության օր» է

Այսօր Ադրբեջանում «լռության օր» է՝ կապված սեպտեմբերի 1-ին կայանալիք Միլլի մեջլիսի ընտրությունների հետ։
 
Ինչպես հայտնում է Caliber.Az-ը, գրանցված թեկնածուների, նրանց լիազոր ներկայացուցիչների և լիազորված անձանց, քաղաքական կուսակցությունների, որոնց թեկնածուները գրանցված են, քաղաքական կուսակցությունների բլոկների, նրանց լիազոր ներկայացուցիչների և լիազորված անձանց նախընտրական քարոզչության համար նախատեսված վերջնաժամկետն ավարտվել է օգոստոսի 31-ին՝ ժամը 08:00-ին։
 
Ընտրական օրենսգրքի համաձայն՝ նախընտրական քարոզարշավը սկսվում է քվեարկության օրվանից 23 օր առաջ և դադարեցվում է քվեարկության մեկնարկից 24 ժամ առաջ։ Միլլի Մեջլիսի ընտրությունների հետ կապված նախընտրական քարոզարշավը մեկնարկել է օգոստոսի 9-ին։
 
Նշենք, որ սեպտեմբերի 1-ին ընտրատեղամասերը բաց կլինեն առավոտյան ժամը 08:00-ից մինչև 19:00-ն: Խորհրդարանական ընտրություններում 125 մանդատի համար պայքարելու է 990 թեկնածու: