Թյուրքական աշխարհի և Կենտրոնական Ասիայի ինտեգրումն անհնար է առանց Ադրբեջանի և Թուրքիայի. ANKASAM-ի տնօրեն

«Կենտրոնական Ասիա + Ադրբեջան» ձևաչափը կամրապնդվի և կընդլայնվի առաջիկա տարիներին։

Report-ի փոխանցմամբ՝ այս մասին հայտարարել է ANKASAM ռազմավարական հետազոտությունների թուրքական կենտրոնի տնօրեն Մեհմեթ Սեյֆեդդին Էրոլը՝ ելույթ ունենալով ադրբեջանական և թուրքական վերլուծական կենտրոնների առաջին Շուշայի ֆորումում։

Մասնագետն ընդգծել է, որ Հայրենական պատերազմից հետո Ադրբեջանի և Թուրքիայի դիրքերը տարածաշրջանում զգալիորեն ամրապնդվել են։ Նա նշել է, որ երկու երկրները կարևոր դեր են խաղում թյուրքական աշխարհի օրակարգի ձևավորման գործում և ունեն զգալի զսպող ներուժ ռազմական ոլորտում։

«Առանց Ադրբեջանի և Թուրքիայի թյուրքական աշխարհի և Կենտրոնական Ասիայի ինտեգրումն անհնար է։ Այսօր տարածաշրջանի պետությունների վստահության մակարդակը զգալիորեն բարձրացել է, հատկապես Ռուսաստանի հետ հարաբերությունների համատեքստում։ Կենտրոնական Ասիայի երկրները ստացել են ավելի մեծ հնարավորություններ անկախ գործողությունների համար, ինչը հատկապես ակնհայտ է Ռուսաստանի և Չինաստանի միջև հավասարակշռության ֆոնին», - նշել է Էրոլը։

Նա նաև ընդգծել է, որ «Կենտրոնական Ասիա + Ադրբեջան» ձևաչափը ոչ միայն կամրապնդվի, այլև կընդլայնվի. «Մենք արդեն տեսնում ենք, որ այս ձևաչափը բացում է ավելի լայն համագործակցության ճանապարհ, հնարավոր է՝ նույնիսկ ընդգրկելով Հարավային Ասիան։ Սա չափազանց կարևոր զարգացում է։ Տարածաշրջանում նոր կառուցվածքային գործընթացը և ավելի կանխատեսելի քաղաքական միջավայրը մեծ նշանակություն ունեն Թուրքական պետությունների կազմակերպության շրջանակներում ինտեգրման համար»։