Ռուսաստանում Ադրբեջանի դեսպանը շնորհակալություն է հայտնել Պուտինին

Ռուսաստանում Ադրբեջանի դեսպան Ռահման Մուստաֆաևը շնորհակալություն է հայտնել Ռուսաստանի նախագահ Վլադիմիր Պուտինին՝ Բաքվի և Երևանի միջև խաղաղ գործընթացին ռուսական կողմի ակտիվ աջակցության համար, գրում է ՏԱՍՍ-ը։

«Ես կուզենայի իմ երախտագիտությունը հայտնել [ՌԴ նախագահ Վլադիմիր Պուտինին], որ ռուսական կողմից նման ակտիվ աջակցություն կա խաղաղ գործընթացին։ Ես շնորհավորել եմ նրան [Ռուսաստանի Դաշնությունում Հայաստանի դեսպան Գուրգեն Արսենյանին] պաշտոնը ստանձնելու կապակցությամբ։ Ուստի մենք նրա հետ, այսպես ասած, կառուցողական հարաբերություններ կպահպանենք Մոսկվայում»,- ասել է դիվանագետը հավատարմագրերի հանձնման արարողության ժամանակ, որը հեռարձակվել է Առաջին ալիքով։

ՌԴ նախագահ Վլադիմիր Պուտինը հավատարմագրերի հանձնման արարողության ժամանակ ասել է, որ Ռուսաստանն ամեն ինչ անում է հայ-ադրբեջանական հարաբերությունները կարգավորելու և Երևանի և Բաքվի միջև խաղաղության պայմանագրի ստորագրման համար։