Սահիբա Գաֆարովան՝ Ադրբեջան-Խորվաթիա առևտրային հարաբերությունների մասին

Ադրբեջանի և Խորվաթիայի միջև առևտրային հարաբերությունները շարունակում են զարգանալ, փոխադարձ առևտրում հատուկ տեղ է զբաղեցնում էներգետիկան։

Report-ի փոխանցմամբ՝ այս մասին հայտարարել է Ադրբեջանի խորհրդարանի խոսնակ Սահիբա Գաֆարովան Բաքվում իր խորվաթ գործընկեր Գորդան Յանդրոկովիչի հետ համատեղ ճեպազրույցի ժամանակ։

Գաֆարովան նշել է, որ այս հանդիպումը պատմական իրադարձություն է, քանի որ 11 տարվա ընթացքում առաջին անգամ է, որ երկու երկրների միջև տեղի է ունենում խորհրդարանական ամենաբարձր մակարդակի պաշտոնական այց։

«Երկու երկրների միջև առկա է փոխադարձ առևտրի բարձր մակարդակ, ընդ որում՝ էներգետիկան հատուկ տեղ է զբաղեցնում տնտեսական հարաբերություններում։ Ադրբեջանը գազ է արտահանում 10 եվրոպական երկրներ, այդ թվում՝ ԵՄ անդամ ութ երկրներ, որոնցից մեկն էլ Խորվաթիան է։ Պարբերաբար քննարկումներ են անցկացվում համագործակցության ընդլայնման վերաբերյալ, այդ թվում՝ Տնտեսական հարաբերությունների խթանման համատեղ հանձնաժողովի գործունեության շրջանակներում», - ընդգծել է Գաֆարովան։

Միլլի Մեջլիսի խոսնակը նշել է միջխորհրդարանական կապերի ամրապնդման առկա ներուժը և ընդգծել, որ Յանդրոկովիչի այցը այդ ներուժը իրացնելու փոխադարձ ցանկության վառ ապացույց է։