Զաքսենհաուզենում տեղադրվել է ադրբեջանական ծագումով գերիների հիշատակին նվիրված հուշատախտակ ԼՈՒՍԱՆԿԱՐ

Մայիսի 4-ին, Գերմանիայում Ադրբեջանի դեսպանատան նախաձեռնությամբ, նախկին Զաքսենհաուզենի (Sachsenhausen) համակենտրոնացման ճամբարի տարածքում բացվել է ադրբեջանական ծագում ունեցող գերիների հիշատակին նվիրված հուշատախտակ։

Ինչպես հաղորդում է AZERTAC-ը, ադրբեջաներեն և գերմաներեն գրություններով հուշատախտակը տեղադրվել է Զաքսենհաուզենի հուշահամալիրի պատին։

Պաշտոնական բացումը տեղի է ունեցել Գերմանիայում Ադրբեջանի դեսպան Նասիմի Աղաևի և Զաքսենհաուզենի հուշահամալիրի տնօրեն Ակսել Դրեկոլի մասնակցությամբ:

Բեռլինի մոտ գտնվող Զաքսենհաուզենի համակենտրոնացման ճամբարում 1936-1945 թվականներին պահվել է ավելի քան 200 000 մարդ։ Նրանցից առնվազն 55 000-ը մահացել են՝ չդիմանալով սարսափելի խոշտանգումներին, անտանելի կալանքի պայմաններին, կամ դաժանորեն սպանվել են նացիստների կողմից։ Գերմանիայում Ադրբեջանի դեսպանատան կողմից Զաքսենհաուզենի արխիվներում անցկացված ուսումնասիրության արդյունքում պարզվել է, որ բանտարկյալների թվում եղել են նաև ադրբեջանական ծագում ունեցող անձինք։ Ավելի ուշ հուշահամալիրի վարչակազմի հետ համաձայնություն ձեռք բերվեց հուշատախտակ տեղադրելու վերաբերյալ։