ԱԳՆ. Հայաստանը մինչ օրս պատասխանատվության չի ենթարկել Խոջալիում հանցագործություն կատարածներին

Ադրբեջանի Հանրապետության արտաքին գործերի նախարարությունը հայտարարություն է տարածել Խոջալուի ցեղասպանության հերթական տարելիցի կապակցությամբ։

Caliber.Az-ի փոխանցմամբ՝ հայտարարության մեջ ասվում է. «2023 թվականի փետրվարի 26-ին լրանում է Խոջալիում Հայաստանի զինված ուժերի կողմից իրականացված ցեղասպանության 31-րդ տարելիցը։ Ադրբեջանի դեմ հայկական ագրեսիայի տասնամյակների ընթացքում խաղաղ բնակչության դեմ իրականացված ամենածանր հանցագործություններից մեկը Խոջալու քաղաքի ավերումը և նրա բնակիչների ոչնչացումն էր։ Մինչ հակամարտությունը Խոջալիում ապրում էր ավելի քան 7000 մարդ։

Խոջալուի ջարդերը և Ադրբեջանի դեմ ագրեսիայի ընթացքում Հայաստանի կողմից իրագործված այլ հանցագործությունները, այդ թվում՝ ռազմական հանցագործությունները, մարդկության դեմ ուղղված հանցագործությունները և ցեղասպանությունը, հանդիսանում են մարդու իրավունքների և միջազգային մարդասիրական իրավունքի լուրջ խախտումներ, մի շարք միջազգային փաստաթղթերի խախտում։

Միջազգային իրավունքի համաձայն՝ պետությունները պատասխանատու են հանցագործությունների հետաքննության և մեղավորների նկատմամբ քրեական հետապնդման համար: Սակայն մինչ այժմ Խոջալուի հանցագործությունների մեղավորներից ոչ մեկը Հայաստանի կողմից պատասխանատվության չի ենթարկվել։

Այնուամենայնիվ, Ադրբեջանը հավատում է, որ ազգային մակարդակով, ինչպես նաև գործող միջազգային իրավունքի շրջանակներում ձեռնարկվող շարունակական միջոցառումները կծառայեն պատասխանատվության ենթարկելու Հայաստանի կողմից Ադրբեջանի դեմ կատարված ծանր հանցագործությունների մեղավորներին»։