ԱԳՆ. Հայաստանը շարունակում է միջամտել Ադրբեջանի ներքին գործերին Ճեպազրույց՝ օտարերկրյա դիվանագետների համար

Ադրբեջանի արտաքին գործերի նախարարությունում փոխնախարար Արազ Ազիմովը ճեպազրույց է անցկացրել՝ երկրում հավատարմագրված դիվանագիտական կորպուսի համար։

ԱԳՆ-ից Caliber.Az-ին հայտնել են, որ ճեպազրույցում մասնակիցները տեղեկացվել են՝ հետհակամարտային շրջանում տարածաշրջանում առկա իրավիճակի և իրողությունների, Ադրբեջանի և Հայաստանի միջև խաղաղ գործընթացի մասին։

Արազ Ազիմովն ընդգծել է, որ պատերազմից հետո Ադրբեջանը հանդես է եկել խաղաղության նախաձեռնությամբ, պատրաստակամություն հայտնել կարգավորել հարաբերությունները Հայաստանի հետ երկկողմ հիմունքներով՝ միջազգային իրավունքի նորմերին ու սկզբունքներին, ինքնիշխան իրավահավասարության, տարածքային ամբողջականության և սահմանների անձեռնմխելիության սկզբունքներին համապատասխան։ Նշվել է, որ առաջին իսկ օրվանից Ադրբեջանի դիրքորոշումը պարզ էր բոլորի համար, և բանակցությունների առարկան են հանդիսանում երեք ուղղությունները՝ խաղաղության պայմանագրի ստորագրումը, սահմանների սահմանազատումը և տարածաշրջանային հաղորդակցությունների բացումը։

Նշվել է, որ չնայած խաղաղության օրակարգի վերաբերյալ Ադրբեջանի հստակ դիրքորոշմանը, Հայաստանն առաջ է քաշում պահանջներ, որոնք չեն տեղավորվում միջազգային իրավունքի ոչ մի նորմի մեջ և հակասում են ողջախոհությանը, առանց որևէ հիմքի, ինչպես նաև փորձում է միջամտել Ադրբեջանի ներքին գործերին, ինչն անընդունելի է:

«Չնայած նրան, որ ՀՀ վարչապետ Նիկոլ Փաշինյանը պաշտոնապես հայտարարություն է տարածել՝ ճանաչելով Ադրբեջանի տարածքային ամբողջականությունն ու ինքնիշխանությունը, Հայաստանի կողմից ձեռնարկվող գործողություններն ուղղված են մեր տարածքային ամբողջականության և ինքնիշխանության դեմ՝ ուղեկցվելով Ադրբեջանի ներքին գործերին միջամտելու փորձերով։ Հայաստանի ձեռնարկած քայլերն ուղղված են դանդաղեցնելու նորմալացման և խաղաղության հաստատման գործընթացը»,- ասել է Արազ Ազիմովը։

Նշվել է, որ Հայաստանը մի կողմից խոչընդոտում է տեղի հայ բնակչության կողմից այդ հնարավորությունների օգտագործումը, իսկ մյուս կողմից՝ «մարդասիրական օգնության» պատրվակով բացահայտորեն միջամտում է Ադրբեջանի ներքին գործերին, շոու է ցուցադրում՝ մոլորության մեջ գցելով միջազգային հանրությանը։