ԱԳՆ. Հայաստանը օկուպացիայի տակ է պահում Ղազախի յոթ և Սադարակի շրջանի մեկ գյուղ

Հայաստանը, չնայած իր խոստումներին, օկուպացիայի տակ է պահում Ղազախի շրջանի յոթ և Սադարակի շրջանի մեկ գյուղ։

Այս մասին հայտնել է Ադրբեջանի ԱԳՆ մամուլի քարտուղար Այխան Հաջիզադեն՝ մեկնաբանելով Հայաստանի ԱԳՆ-ի մարտի 18-ի հակաադրբեջանական հայտարարությունը։

Նրա խոսքով, հայկական կողմն է, որ եռակողմ հայտարարության ստորագրումից երկու շաբաթ անց իր զինծառայողներին ապօրինի տեղափոխել է Ադրբեջանի տարածք, որտեղ նրանք ռազմական սադրանք են կատարել. «Չնայած այդ կալանավորներին որպես ռազմագերի ներկայացնելու Հայաստանի փորձերին` այդ անձինք չեն ճանաչվել որպես ռազմագերի, և Արդարադատության միջազգային դատարանը, ինչպես նաև Մարդու իրավունքների եվրոպական դատարանը մերժել են այդ հայցը և նրանց ազատ արձակելու պահանջը»:

«Հայկական կողմը, հակառակ եռակողմ հայտարարության, ամբողջությամբ դուրս չի բերել իր զինված ուժերը Ադրբեջանի ինքնիշխան տարածքներից, և չնայած եռակողմ հայտարարությունը ստորագրելիս տրված խոստմանը, շարունակում է օկուպացիայի տակ պահել մի շարք բնակավայրեր և տարածքներ, այդ թվում՝ Ղազախի յոթ գյուղեր և Սադարակի շրջանի մեկ գյուղ»,- ընդգծել է Ադրբեջանի ԱԳՆ ներկայացուցիչը։