Ադրբեջանա-թուրքական վարժանքներ. 3000 զինվորական, հարյուրավոր զրահատեխնիկա և հրետանային կայանք ՏԵՍԱՆՅՈՒԹ

Ադրբեջանական բանակի և Թուրքիայի Զինված ուժերի զինծառայողների ներգրավմամբ անցկացվող «Մուստաֆա Քեմալ Աթաթուրք-2023» համատեղ մարտավարական զորավարժություններում շարունակվում է «Բարձրաստիճան դիտորդների օրը»:

Այս մասին հայտնում է Caliber.Az-ը՝ հղում անելով ՊՆ-ին։

Զորավարժությունների շտաբ ժամանած հյուրերը լսել են զեկույցներ համատեղ մարտավարական վարժանքների սցենարի և առաջադրանքների մասին։

Զեկուցվել է, որ Ադրբեջանի տարբեր շրջաններում՝ Բաքվում, Նախչըվանի Ինքնավար Հանրապետությունում և ազատագրված տարածքներում անցկացվող զորավարժություններում ներգրավված են երկու երկրների տարբեր զորատեսակների մինչև 3000 անձնակազմ, 130 միավոր զրահատեխնիկա, մինչև 100 հրետանային կայանք, ավելի քան 20 ավիացիոն և թռիչքային միջոցներ, ինչպես նաև ինժեներական տեխնիկա:

Հիմնական ուշադրությունը դարձվել է զորքերի փոխգործակցությանը, կառավարման և հսկողության կատարելագործմանը, փորձի փոխանակմանը և անձնակազմի պրոֆեսիոնալիզմի մակարդակի բարձրացմանը։

Զորավարժությունների ընթացքում առաջադրված բոլոր առաջադրանքները զինվորականների կողմից կատարվում են բարձր պրոֆեսիոնալիզմով։