Ադրբեջանը բողոքի նոտա է հղել Ռուսաստանին

Ռուսաստանի Դաշնությունում Ադրբեջանի Հանրապետության դեսպանությունը բողոքի պաշտոնական նոտա է հղել՝ Ռուսաստանի Դաշնության արտաքին գործերի նախարարությանը՝ 2022թ. հոկտեմբերի 20-ին և 21-ին Առաջին ալիքում՝ «Մեծ խաղ» հաղորդաշարի եթերում հայտնվելու կապակցությամբ, որում ռուս քաղաքագետներն ու հայազգի փորձագետները հանդես են եկել բացահայտ հակաադրբեջանական հարձակումնեով, կասկածի տակ է դրվել Ադրբեջանի Հանրապետության տարածքային ամբողջականությունը, խեղաթյուրվել է մեր երկրի ցուցադրված աշխարհագրական քարտեզը։

Այս մասին ասվում է Մոսկվայում Ադրբեջանի դեսպանատան հաղորդագրության մեջ, փոխանցում է Caliber.Az-ը։

Նոտայում մասնավորապես ընդգծվում է, որ թոք-շոուի հյուրերն իրենց ելույթներով հրահրում են հայ հասարակության ռևանշիստական ուժերին, վերակենդանացնում անցյալում մնացած հակամարտությունը և բացահայտորեն սատարում են անջատողականությանը, թշնամություն սերմանում երկու ժողովուրդների միջև։

Դեսպանությունը նախարարության ուշադրությանն է ներկայացրել, որ պետական հեռուստաալիքի եթերում կանխակալ հայտարարությունների օգտագործումը և ակնհայտ քաղաքական սադրանքների թույլատրումը հակասում է ոչ միայն ՌԴ նախագահի կողմից բազմիցս հնչեցրած և Ադրբեջանի տարածքային ամբողջականությանն աջակցության վերաբերյալ Ռուսաստանի պաշտոնական դիրքորոշմանը, այլ նաև խաթարում է տարածաշրջանում երկարաժամկետ խաղաղության, կայունության և անվտանգության ապահովմանն ուղղված քայլերը։

Նշվել է, որ տարածաշրջանում առկա փխրուն խաղաղության պայմաններում լրատվամիջոցների ներկայացուցիչները հատուկ պատասխանատվություն են կրում սադրանքները կանխելու համար, որոնք կարող են հանգեցնել լարվածության և սրել իրավիճակը։

Ցավով ընդգծվել է նաև, որ այս թոք-շոուի վարողն ու «ներկայացման» անմիջական հանցակիցը հանդիսանում է՝ «Եդինայա Ռոսիա» խմբակցության անդամ, ՌԴ Պետդումայի միջազգային հարաբերությունների հանձնաժողովի նախագահի առաջին տեղակալ Վյաչեսլավ Նիկոնովը։

«Ռուսաստանի իշխող կուսակցության ներկայացուցիչների նման պահվածքը հակասում է ադրբեջանա-ռուսական դաշնակցային փոխգործակցության ոգուն, ինչպես նաև էական վնաս է հասցնում երկկողմ հարաբերություններին։ Դեսպանությունը կրկին ռուսական կողմի ուշադրությունը հրավիրել է այն փաստի վրա, որ Ադրբեջանի Հանրապետության և Ռուսաստանի Դաշնության 2022 թվականի փետրվարի 22-ի դաշնակցային համագործակցության մասին հռչակագրի համապատասխան դրույթները կոչ են պարունակում՝ զերծ մնալ ռազմավարական գործողություններին վնասող ցանկացած գործողությունից գործընկերության, դաշնակցային հարաբերությունների և պետական ինքնիշխանության, անկախության և պետությունների տարածքային ամբողջականության դեմ ուղղված գործողություններից, ինչպես նաև նախատեսում են համատեղ ջանքեր անջատողականությանը հակազդելու համար։ Ադրբեջանական կողմը ռուսական կողմին հորդորել է հրատապ միջոցներ ձեռնարկել՝ զսպելու ռուսական լրատվամիջոցների ներկայացուցիչների սադրիչ գործողությունները և կանխելու դրանց կրկնությունը ապագայում»,- ասվում է հաղորդագրությունում։