Ադրբեջանի դեսպան. Զանգվածային գերեզմանների հայտնաբերման արդյունավետ աշխատանքն անհնար է առանց ականազերծման

Նիդեռլանդներում Ադրբեջանի դեսպան Ռահման Մուստաֆաևը երեկ Հաագայում հանդիպել է Անհայտ կորածների հարցերով միջազգային հանձնաժողովի (ICMP, International comission for missing persons) տնօրենների խորհրդի անդամների հետ։

Այս մասին հայտնում է Armenia.Az-ը՝ հղում անելով Նիդեռլանդներում Ադրբեջանի դեսպանատանը։

Հանդիպման ընթացքում դեսպանը զրուցակիցներին հանգամանորեն տեղեկացրել է տարածաշրջանում տիրող հետհակամարտային իրավիճակի, Հայաստանի հետ հարաբերությունների կարգավորման, հայկական օկուպացիայից ազատագրված Ղարաբաղի մարզի քաղաքների ու գյուղերի վերականգնման, ազատագրված տարածքների ականազերծման ուղղությամբ Ադրբեջանի գործադրած ջանքերի մասին։

Անդրադառնալով ICMP գնահատող առաքելության վերջերս Ադրբեջան կատարած այցին՝ դեսպանն ընդգծել է, որ Ադրբեջանի գրեթե 4000 անհետ կորած քաղաքացիների ընտանիքները սպասում են արդարության, և որ Ադրբեջանում անհայտ կորածների զանգվածային գերեզմանները հայտնաբերելու արդյունավետ աշխատանքն անհնար է առանց ազատագրված տարածքների ականազերծման։

«Մենք մեր հանդիպումն անցկացնում ենք Սրեբրենիցայի ցեղասպանության զոհերի հիշատակի օրվա նախօրեին, որի ժամանակ սպանվել է մոտ 8000 բոսնիացի խաղաղ բնակիչ»,- ասել է ադրբեջանցի դիվանագետը՝ հավելելով, որ հակամարտության ընթացքում անհետ կորած Ադրբեջանի քաղաքացիների թիվը կազմում է Սրեբրենիցայի ջարդերի զոհերի թվի գրեթե կեսը, սակայն, ադրբեջանական հասարակության համար շատ զգայուն այս խնդրի նկատմամբ միջազգային ուշադրությունն ակնհայտորեն բավարար չէ։