Ադրբեջանի դեսպան. Ցավոք, Հաագան դեռ պատրաստ չէ օբյեկտիվորեն գնահատել իրավիճակը մեր տարածաշրջանում

Նախօրեին Նիդեռլանդների Ներկայացուցիչների պալատի կողմից ընդունված Հայաստանին ռազմական աջակցության կոչը կառավարության և խորհրդարանի համաձայնեցված գործողությունն է։

Այս մասին հայտնել է Նիդեռլանդներում Ադրբեջանի դեսպան Ռահման Մուստաֆաևը։

«Այս փաստաթղթի նախագծի քննարկման փուլում, խորհրդարանական քննարկումների ժամանակ Նիդեռլանդների ԱԳՆ ղեկավարն ակտիվորեն աջակցել է դրան՝ հայտարարելով, որ ինքը հանդես կգա ԵՄ-ում Հայաստանին ավելի մեծ աջակցության օգտին: Չնայած Նիդեռլանդների ԱԳՆ-ում հանդիպումների ժամանակ մեր բազմիցս զգուշացումներին, որ այս կոչի գործնական իրականացումը կարող է հանգեցնել տարածաշրջանի էլ ավելի մեծ ռազմականացման և բացասաբար անդրադառնալ բանակցային գործընթացի, ինչպես նաև հենց Հայաստանի վիճակի վրա, ԱԳՆ-ն և խորհրդարանը անտեսեցին դրանք»,- ասել է դեսպանը:

«Ցավոք, Հաագան, որը հավակնում է լինել իրավունքի և արդարադատության միջազգային մայրաքաղաք, դեռ պատրաստ չէ օբյեկտիվ, հավասարակշռված, հաշվի առնելով միջազգային իրավունքի դիրքորոշումները, գնահատել իրավիճակը մեր տարածաշրջանում»,- ընդգծել է Մուստաֆաևը:

«Կարծում եմ, որ խաղաղ գործընթացի տրամաբանությունը և եվրոպական առաջատար մայրաքաղաքների, այդ թվում՝ Հաագայի հետ աշխատանքը կօգնի չեզոքացնել Նիդեռլանդների խորհրդարանի այս վտանգավոր նախաձեռնությունները»,- ասել է Ադրբեջանի դեսպանը։