Ադրբեջանի խորհրդարանը բողոքի նամակ է հղել Չեխիային

Մայիսի 24-ին Չեխիայի հետ Միլլի Մեջլիսի միջխորհրդարանական կապերի աշխատանքային խմբի ղեկավար Էլնուր Ալլահվերդիևը՝ խմբի անդամների անունից բողոքի նամակ է հղել՝ Չեխիայի Հանրապետության խորհրդարանի պատգամավորների պալատի Չեխիա-Ադրբեջան միջխորհրդարանական կապերի բարեկամության խմբի անդամներին։

Ըստ Report-ի՝ նամակում նշվում է, որ Չեխիայի խորհրդարանի Պատգամավորների պալատի նախագահի տեղակալ Յան Բարտոշեկի՝ Հայաստանի դեսպան Աշոտ Հովակիմյանի հետ հանդիպման ժամանակ արված հայտարարությունները խորը ափսոսանք են առաջացրել Ադրբեջանի Հանրապետության Միլլի Մեջլիսի՝ Ադրբեջան-Չեխիա միջխորհրդարանական կապերի աշխատանքային խմբի անդամների մոտ։ ։

Նշվել է, որ Յան Բարտոշեկի միակողմանի մեկնաբանությունները ոչ միայն չեն արտացոլում ճշմարտությունը, այլև հակասում են՝ Ադրբեջանի և Չեխիայի խորհրդարանների միջև վերջին տարիներին ի հայտ եկած և արդարացված բարեկամության և համագործակցության ոգուն։ Նշվում է նաև, որ պարոն Բարտոշեկը, կարծես թե, տեղյակ չէ անցյալ հակամարտության պատմության իրական պատճառներին, ինչպես նաև վերջին 3 տարիներին տարածաշրջանում ձևավորված նոր իրողություններին ու Հայաստանի և Ադրբեջանի միջև խաղաղության օրակարգի մասին։ Բարեկամական երկրի խորհրդարանի Պատգամավորների պալատի փոխնախագահ պարոն Բարտոշեկի հայտարարությունները վնասում են՝ մեր երկրների միջև առողջ համագործակցությանը և բարեկամական հարաբերություններին։

Նամակի տեքստում նշվում է. «Չեխիայի հետ միջխորհրդարանական կապերի աշխատանքային խումբը պարոն Բարտոշեկի ուշադրությանն է ներկայացնում, որ Ադրբեջանի Հանրապետության տարածքի 20%-ը 30 տարի օկուպացված է եղել Հայաստանի կողմից։ Այս ընթացքում Հայաստանը թալանել ու ավերել է ադրբեջանցիներին պատկանող բնակավայրերը, ավերել ու կեղծել է պատմաճարտարապետական հուշարձանները, պղծել Ադրբեջանին պատկանող կրոնական շինությունները։ Ամբողջ աշխարհը, այդ թվում՝ հենց Հայաստանը և պարոն Բարտոշեկի երկիրը՝ Չեխիան, այս տարածքը ճանաչել են որպես Ադրբեջանի անբաժանելի մաս։ Նման պայմաններում նախագահի տեղակալի կողմից այս հարցում իր սեփական պետության պաշտոնական դիրքորոշման բացահայտ անտեսումը կամ փաստերի միտումնավոր խեղաթյուրումը մեզ զարմանք և խորը ափսոսանք է առաջացնում»։