Ադրբեջանի ՊՍԾ-ի ղեկավար. Միջոցներ են ձեռնարկվում սահմանային ենթակառուցվածքների կատարելագործման համար

Սահմանային անվտանգության ապահովման հարցերը գտնվում են Ադրբեջանի նախագահ Իլհամ Ալիևի հատուկ ուշադրության ներքո։
 
Ինչպես ահյտնում է Report-ը, այս մասին Բաքվում  անցկացվող՝ ԱՊՀ երկրների սահմանապահ զորքերի հրամանատարների խորհրդի 86-րդ նիստում հայտարարել է՝ Ադրբեջանի պետական սահմանապահ ծառայության ղեկավար Էլչին Գուլիևը։
 
«Վերջին 20 տարիների ընթացքում պետության ղեկավարն ավելի քան քառասուն անգամ այցելել է պետական սահմանապահ  ծառայության տարբեր զորամասեր և անձամբ ծանոթացել ստորաբաժանումներում տիրող իրավիճակին։ Պարոն նախագահի անմիջական աջակցությամբ իրականացվել և շարունակվում է իրականացվել՝ սահմանային անվտանգության ապահովման համակարգի կատարելագործմանն ուղղված միջոցների և միջոցառումների շարք»,- ասել է Է.Գուլիևը։
 
Նրա խոսքով, ձեռնարկվում են անհրաժեշտ միջոցներ՝ սահմանային ենթակառուցվածքների կատարելագործման, անձնակազմի սոցիալական պաշտպանության բարելավման ուղղությամբ։
 
«Հատուկ ուշադրություն է դարձվում օկուպացիայից ազատագրված տարածքներում սահմանային ենթակառուցվածքների ստեղծմանը»,- հայտարարել է Պետական սահմանապահ ծառայության պետը։