Ադրբեջանում Իրանի դեսպանը կանչվել է ԱԳՆ Նրան փոխանցել են պաշտոնական Բաքվի դժգոհությունը

Ադրբեջանում Իրանի դեսպան Սեյիդ Աբբաս Մուսավին նոյեմբերի 11-ին կանչվել է արտաքին գործերի նախարարություն:

Ինչպես Caliber.Az-ին հայտնել են ԱԳՆ մամուլի ծառայությունից, հանդիպմանը հակառակ կողմին են ներկայացրել ադրբեջանական կողմի դժգոհությունն ու մտահոգությունը՝ կապված իրանական լրատվամիջոցներում Ադրբեջանի Հանրապետության դեմ տարվող քարոզչության, զրպարտչական արշավի, Իրանի բարձրաստիճան քաղաքական և ռազմական պաշտոնյաների սպառնալից հռետորաբանության հետ, որոնք չեն համապատասխանում երկու երկրների հարաբերությունների ոգուն։

Մեկ անգամ ևս ընդգծվել է Ադրբեջանի սահմանադրական կարգի դեմ հանցագործություն կատարած և դատարանի որոշմամբ միջազգային հետախուզման մեջ գտնվող Ադրբեջանի Հանրապետության քաղաքացիների համար Իրանում ապրելու պայմաններ ստեղծելու անընդունելիությունը, և հանցագործների արտահանձնման անհրաժեշտությունը։

Նշվել է, որ Ադրբեջանի Հանրապետությունում անջատողականություն հրահրող և քրեական հետապնդումից խուսափելու համար այլ երկրներում թաքնվող անձանց Իրանի դեսպանատներում ընդունելը անբարյացակամ քայլ է:

Ընդգծվել է, որ Իրանի կողմից նման տեղեկատվության հրապարակումը և Ադրբեջանի դեմ գործողությունների իրականացումը անընդունելի է: Բաքուն ակնկալում է, որ դա կարճ ժամկետներում կդադարեցվի: