Ադրբեջանցի պատգամավոր. Ֆրանսիայի ԱԳՆ ղեկավարի ոչ տեղին հայտարարությունները ոչ մի իմաստ չունեն
Ֆրանսիայի Եվրոպայի և արտաքին գործերի նախարար Քեթրին Կոլոննայի ոչ տեղին և անհավանական հայտարարություններն Ադրբեջանի համար որևէ նշանակություն չունեն։
Այս մասին Caliber.Az-ին ասել է պատգամավոր Վուգար Իսկենդերովը։
Նա հիշեցրել է, որ Ֆրանսիայի ԱԳՆ ղեկավարը վերջերս Twitter-ում հայտարարություններ էր արել, որոնք անհարիր են արտաքին քաղաքական գերատեսչության ղեկավարին. «Կոլոննան հայտարարել է, որ Ֆրանսիան առաջին իսկ օրվանից դատապարտում է Ադրբեջանի կողմից՝ Լաչինի ճանապարհի այսպես կոչված «փակումը», և նա մտադիր է ապրիլի վերջին այցելել Բաքու և Երևան՝ այդ միտքը փոխանցելու համար։ Կարծում եմ, որ այս խոսքերը վրդովեցուցիչ են: Նման մոտեցմամբ Ֆրանսիան հերթական անգամ ծաղրի ենթարկեց իրեն»։
Պատգամավորի խոսքով՝ Քեթրին Կոլոննան իր մեկնաբանություններով խախտում է միջազգային իրավունքի նորմերն ու սկզբունքները.
«Դժվար է հասկանալ՝ սա նախարարի՞, թե՞ ուսանողի ելույթ է։ Ֆրանսիայի կառավարության ղեկավարը պետք է գիտակցի, որ իրենց առջև ոչ թե Կորսիկա կղզին է կամ այն երկրները, որոնց Ֆրանսիան ստրկացրել է, այլ Կովկասի առաջատար երկիրը՝ Ադրբեջանը։ Նույն Ադրբեջանը, որն ամենաբարձր ամբիոնից ողջ աշխարհին հայտարարել է Ֆրանսիայի հանցագործությունների մասին ու կոչ է արել նրանց՝ ներողություն խնդրել։ Եվ այսօր Ադրբեջանն իր անհամաձայնությունն է հայտնում Ֆրանսիայի կեղծավոր քաղաքականությանը՝ նրանց իրենց տեղը դնելով»։