Ամիրբեկով. Հայաստանը պետք է Ադրբեջանին հուսալի երաշխիքներ տրամադրի Զանգեզուրի միջանցքի երկայնքով

Հայաստանը պետք է Ադրբեջանին հուսալի երաշխիքներ տրամադրի Զանգեզուրի միջանցքի երկայնքով՝ Ադրբեջանի հիմնական մասի և Նախչըվանի միջև անխափան երթևեկության համար։

Այդ մասին ասել է Ադրբեջանի նախագահի հատուկ հանձնարարություններով ներկայացուցիչ Էլչին Ամիրբեկովը՝ պատասխանելով ԱՄՆ-ի Հադսոնի ինստիտուտի Մերձավոր Արևելքի խաղաղության և անվտանգության կենտրոնի տնօրեն Մայքլ Դորանի և ինստիտուտի ավագ գիտաշխատող Լյուկ Քոֆֆիի հարցերին։

«Ինչ վերաբերում է Զանգեզուրի միջանցքին, ապա հայերը, հավանաբար, մեզ սխալ են հասկացել, ադրբեջանական կողմը չի հավակնում այդ տարածքներին և ճանաչում է դրանք որպես Հայաստանի ինքնիշխան տարածք»,- ասել է նա։

Էլչին Ամիրբեկովը նշել է, որ այլ հարց է, թե ինչպես են հայերը ապահովելու միջանցքի անվտանգությունը:

«Սա առանձին խնդիր է, քանի որ եռակողմ հայտարարությամբ ռուս սահմանապահները պետք է ապահովեին երթևեկության անվտանգությունը: Հիմա, կարծես թե, հայերը վերանայում են այդ պարտավորությունը, քանի որ ռուսներին վերապահված այդ դերն այլևս ընդունելի չեն համարում»,- ասել է Էլչին Ամիրբեկովը: