ԱՄՆ-ն հարձակման է անցնում Ադրբեջանի վրա

Միացյալ Նահանգները և կոնկրետ Պետդեպարտամենտը, որը գրեթե 30 տարի անտեսում էր Հայաստանի կողմից ադրբեջանական տարածքների օկուպացումը, էթնիկ զտումները, Խոջալուի ցեղասպանությունը, մեկ միլիոն ադրբեջանցի փախստականների և ներքին տեղահանվածների առկայությունը, դիմեցին հերթական անհեթեթ քայլին, որը կհարվածի ամերիկա-ադրբեջանական հարաբերություններին և վերջնականապես կխաթարի Վաշինգտոնի իմիջը` որպես բանակցությունների անաչառ մոդերատոր։

Ինչպես հաղորդում է Caliber.Az-ը, ելույթ ունենալով ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովում ստեղծված իրավիճակի վերաբերյալ լսումների ժամանակ, ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ Բրայենը ասել է, որ Միացյալ Նահանգները դադարեցրել է Ադրբեջանին տրամադրվող ռազմական և այլ տեսակի օգնությունը, չեղյալ է հայտարարել բարձր մակարդակի որոշ այցեր, իսկ Վաշինգտոնը Բաքվին ազդարարել է, որ երկկողմ հարաբերությունների կարգավորում չի լինի այնքան ժամանակ, քանի դեռ Հայաստանի հետ խաղաղ բանակցություններում առաջընթաց չի գրանցվել:

«Մենք հստակ հասկացրել ենք, որ սեպտեմբերի 19-ի իրադարձություններից հետո Ադրբեջանի հետ ոչինչ նորմալ չի լինի, քանի դեռ խաղաղության ճանապարհին առաջընթաց չենք տեսել: Այսպիսով, մենք չեղարկել ենք բարձր մակարդակի մի շարք այցեր, դատապարտել Բաքվի գործողությունները»:

«Մենք բազմիցս ազդարարել են, որ Հայաստանի ներսում ուժի կիրառումը միանգամայն անընդունելի է», - ասել է ԱՄՆ պետքարտուղարի օգնականն ու անմիջապես խոստովանել, որ Ադրբեջանը Միացյալ Նահանգների ուշադրությանն է ներկայացրել նման ծրագրերի բացակայության մասին տեղեկություն։

«Բաքվի իշխանությունները մեզ հավաստիացրել են, որ իրենք նման մտադրություն չունեն: Եվ մենք շատ ուշադիր հետևում ենք զորքերի տեղաշարժին ու ցանկացած նշանի, որ նրանք կարող են այլ ծրագրեր ունենալ։ Ինչպես նշեցի, մենք նրանց ասել ենք՝ սովորականի պես գործերին վերադառնալու հնարավորություն չկա, քանի դեռ խաղաղության պայմանագիրը կնքված չէ», - հավելել է նա։

Բաքվում արդեն հոգնել են կրկնելուց, որ Ադրբեջանին նոր պատերազմ պետք չէ, նա չի ծրագրում հարձակվել Հայաստանի վրա։ Բայց ԱՄՆ-ը խուլ է մնում: Ինչը զարմանալի չէ Վաշինգտոնի և Երևանի միջև խորհրդակցությունների մասին Caliber–ի տրամադրած տեղեկատվության լույսի ներքո։