ԱՄՆ Պետդեպը՝ Էդիլլիի զանգվածային գերեզմանների մասին. մեղավորները պետք է պատասխանատվության ենթարկվեն

Ղարաբաղյան պատերազմի ժամանակ ռազմական հանցագործությունների բոլոր մեղավորները պետք է պատասխանատվության ենթարկվեն:

Ինչպես հաղորդում է Caliber.Az-ը, այս մասին ճեպազրույցի ժամանակ հայտարարել է ԱՄՆ Պետդեպարտամենտի մամուլի ծառայության ղեկավարի տեղակալ Վեդանտ Պատելը` մեկնաբանելով Ադրբեջանի Խոջավենդի շրջանի Էդիլլի գյուղում հերթական զանգվածային գերեզմանի հայտնաբերումը։

«Մենք ցնցված ենք տասնամյակներ շարունակվող այս հակամարտության ընթացքում մարդկային կորուստներից և մեր խորին ցավակցությունն ենք հայտնում զոհվածների ընտանիքներին: Շատ ընտանիքներ այս հակամարտության ընթացքում կորցրել են իրենց հարազատներին»,- ասել է ԱՄՆ Պետդեպարտամենտի մամուլի ծառայության ղեկավարի տեղակալը։

«Մեղավորները պետք է պատասխանատվության ենթարկվեն: Խաղաղության հասնելու, ապաքինվելու համար պատասխանատվություն է պետք»,- ընդգծել է Վեդանտ Պատելը։