Բայրամով. Հայաստանի հետ խաղաղության պայմանագիրը պետք է մշտական լինի

Պաշտոնական Բաքվի ակնկալիքները Հայաստանից կայանում են նրանում, որ երկու երկրներն էլ կհամաձայնեն խաղաղության պայմանագրի՝ հիմնված միմյանց տարածքային ամբողջականության ճանաչման վրա ոչ թե խոսքով, այլ գործով։

Ինչպես հաղորդում է Caliber.Az-ը, այս մասին Անթալիայում դիվանագիտական ֆորումի շրջանակներում լրագրողներին ասել է Ադրբեջանի արտգործնախարար Ջեյհուն Բայրամովը։

Նախարարն ընդգծել է, որ խաղաղության պայմանագիրը պետք է մշտական լինի, որպեսզի հետագայում լրացուցիչ հարցեր չառաջացնի։

«2021 թվականի հունվարից Ադրբեջանը սկսեց քայլեր ձեռնարկել Հայաստանի հետ հարաբերությունները կարգավորելու ուղղությամբ։ 2022 թվականին Ադրբեջանը հայտարարեց 5 հիմնական սկզբունքների մասին, որոնք կարևոր նշանակություն ունեն: Այդ 5 հիմնական սկզբունքներն ընդունվել են Հայաստանի կողմից։ Միաժամանակ այն դրական է գնահատվել միջազգային հանրության կողմից։ Ադրբեջանի կողմից պատրաստված և մյուս կողմին ներկայացված փաստաթղթի նախագիծը նույնպես կառուցվել է այդ նույն սկզբունքների վրա, որը ձևավորվել է միջազգային իրավունքի նորմերին համապատասխան»,- ընդգծել է Բայրամովը։