Բյուլբյուլօղլուն մատնանշել է փաստերը, որոնք ստվեր են գցում ռուս-ադրբեջանական հարաբերությունների վրա

Հուլիսի 17-ին Ռուսաստանում Ադրբեջանի դեսպան Փոլադ Բյուլբյուլօղլուն հանդիպել է ՌԴ փոխարտգործնախարար Անդրեյ Ռուդենկոյի հետ, հայտնում է Caliber.Az-ը։

Մոսկվայում Ադրբեջանի դեսպանատնից տեղեկացրել են՝ հանդիպմանը Ռուդենկոն նշել է, որ այսօր Ռուսաստանի գլխավոր նպատակը Ադրբեջանի և Հայաստանի միջև խաղաղության համաձայնագրի ստորագրումն է: Նրա խոսքով, ռուսական կողմը պատրաստ է համակողմանի աջակցություն ցուցաբերել այդ գործընթացին, այդ թվում՝ իր տարածքում հանդիպումներ կազմակերպել։

Բացի այդ, նա անդրադարձել է Ադրբեջանի տարածքում ժամանակավորապես տեղակայված ռուսական խաղաղապահ ուժերի գործունեությանը։

Դեսպանը նշել է, որ Լաչինի սահմանային անցակետով հայերի ազատ և անարգել անցման համար որևէ խոչընդոտ չկա, ընդգծել է, որ Լաչինի ճանապարհը հայերն օգտագործում են այլ նպատակներով, այդ թվում՝ Կարմիր Խաչի միջազգային կոմիտեի հումանիտար օգնության քողի տակ Ադրբեջանի տարածք ռազմական զինամթերք և մաքսանենգ ապրանքներ տեղափոխելու համար: Դեսպանը նշել է, որ դա հաստատող բազմաթիվ փաստաթղթեր ու տեսանյութեր կան։

Անդրադառնալով ռուսական խաղաղապահ զորախմբի գործունեությանը՝ Բյուլբյուլօղլուն ընդգծել է, որ հայերը խաղաղապահների ուղեկցությամբ գաղտնի լեռնային ճանապարհներով անհայտ ապրանքներ են տեղափոխում Խանքենդի։ Այնտեղ իրականացվում է դպրոցականների զինվորական պատրաստություն։ Այս ամենը Ադրբեջանում արդարացի դժգոհություն է առաջացնում և ստվեր գցում ռուս-ադրբեջանական հարաբերությունների վրա։