Բրյուսելում երեք առաջնորդների հանդիպման առանցքային պահերը Խոսում է Շառլ Միշելը

Եվրոպական խորհրդի նախագահ Շառլ Միշելը Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի հետ եռակողմ բանակցություններից հետո հանդես է եկել հայտարարությամբ։

«Սա հերթական էր Հայաստանի և Ադրբեջանի ղեկավարների, փոխվարչապետների և արտաքին գործերի նախարարների մասնակցությամբ ինտենսիվ և արդյունավետ բարձր մակարդակի հանդիպումների շարքից, որոնք անցկացվել են մայիսի սկզբից Բրյուսելում, Քիշնևում, Վաշինգտոնում, Մոսկվայում և երկկողմ սահմանին: Մենք անցնում ենք Հայաստանի և Ադրբեջանի միջև բանակցությունների ամենաընդգրկուն և ակտիվ փուլերից մեկը», - ասել է Միշելը:

Նրա խոսքով, Ադրբեջանի և Հայաստանի ղեկավարները ևս մեկ անգամ վերահաստատել են փոխադարձաբար երկու երկրների տարածքային ամբողջականության և ինքնիշխանության ճանաչումը՝ ելնելով նրանից, որ Ադրբեջանի տարածքը կազմում է 86 600 Քկմ, իսկ Հայաստանինը՝ 29 800 Քկմ:

«Քննարկվեցին հստակ քայլեր, որպեսզի օգնենք իրավիճակը նորից վերադառնա իր նորմալ ընթացքին։ Ես նկատեցի Ադրբեջանի պատրաստակամությունը Աղդամով հումանիտար օգնություն հասցնելու հարցում։ Եվրամիությունը շարունակում է ներգրավված լինել, որպեսզի Լեռնային Ղարաբաղի նախկին ինքնավար մարզի ներկայացուցիչների և Բաքվի միջև բանակցություններ սկսվեն»,-նշել է ԵՄ խորհրդի նախագահը։

ԵՄ խորհրդի նախագահը հավելել է, որ քննարկման առարկա դարձած` սահմանների դելիմիտացիան պետք է իրականացվի ըստ 1991 թվականի Ալմաթիի հռչակագրի։ Միշելն ընդգծել է, որ եռակողմ հանդիպմանը քննարկվել են գերիների և սխալմամբ մյուս կողմ անցած զինվորների հարցերը։

Վերջում Շառլ Միշելը հայտարարել է Հայաստանի և Ադրբեջանի ղեկավարներին Բրյուսելում կայանալիք հերթական հանդիպմանը հրավիրելու մտադրության մասին, ինչպես նաև հերթական հնգակողմ հանդիպմանը՝ Ֆրանսիայի և Գերմանիայի ղեկավարների մասնակցությամբ, Գրանադայում (Իսպանիա) Եվրոպական քաղաքական համայնքի հաջորդ գագաթնաժողովի շրջանակներում: