ԵՄ-ն շնորհակալություն է հայտնել Ադրբեջանին

Ադրբեջանում Եվրամիության (ԵՄ) ներկայացուցիչ Պյոտր Միխալկոն շնորհակալություն է հայտնել Ադրբեջանին բուժաշխատողներին ցուցաբերվող մշտական աջակցության համար։

Ինչպես հայտնում է Caliber.Az-ը, այս մասին նա հայտարարել է բուժաշխատողների շարունակական բժշկական կրթությանն ու վարակի կանխարգելման ու վերահսկման համար պարագաների փոխանցմանը նվիրված արարողության ժամանակ ունեցած ելույթում։

«Մեր համագործակցությունը համաճարակի դեմ պայքարում պետք է լինի համաշխարհային մակարդակով: Մենք համերաշխ ենք և շարունակում ենք համագործակցությունը Ադրբեջանի հետ։ Մեր հանդիպման հիմնական նպատակն է ցույց տալ, որ մենք գործընկերներ ենք։ Այսօր մեր համագործակցությունը, հատկապես համաճարակի պայմաններում, ավելի նշանակալից է: Օգտվելով առիթից՝ ցանկանում եմ նաև իմ խորին երախտագիտությունը հայտնել առաջին գծում համաճարակի դեմ պայքարող բուժաշխատողներին»,- ասել է ԵՄ ներկայացուցիչը։